Todd Boehly-a'n Chelsea a enkawl atangin Blues an buai chho ngar ngar. Manager chi hrang hrang an nei a, result duhthusam an hlawhchhuak hleithei lo.

Pochettino banin tun nipui atang khan Enzo Maresca an chhawr tan. Ani hian nasa takin hma a rawn sawnpui a, mahse Chelsea manager hian Premier League champion rinkai Arsenal leh Manchester City te chu an la el phak loh thu a sawichhuak.

Ningani zan khan 4-2 in UEFA Europa Conference League-ah Gent an hneh a, Chelsea boss Maresca chuan, "Premier League lam kan thlir chuan, Arsenal leh Manchester City te hi chu kan la el phak lo deuh a ni tun season-ah hi chuan.

"A chhan chu kan la inpeih lo deuh. City hian manager ngai kum 9 chhung zet an nei tawh a, Arsenal pawhin kum 5 chhung an manager hi an chhawr tawh. Trophy lian hlawhchhuak tur chuan hun kan mamawh ve a ni.

"Arsenal-in PSG an hneh hnu lawk khan Luis Enrique pawhin ka sawi ang chiah hi a sawi a nih kha. Kum 5 chhung Arteta an chhawr tawh a, anni erawh kum khat leh a chanve chiah an la inchhawr.

"Thla thum emaw chhung lek keini pawh kan la inenkawl, anni team pahnih nen chuan kan la inthlau lutuk. Tun dinhmunah hi chuan Arsenal leh Man City te hi kan la khing phak lo deuh a ni e," tiin a sawi.

Enzo Maresca hi a inngaitlawm em em, hetih lai hian reilote chhungin Chelsea-ah danglamna nasa tak a thlen. Premier League-ah 4-na a nihpui mek a, game 6 atangin vawi 4 hnehna a chanpui a, vawi 1 chak loin, vawi khat an khingpui an inhnehtawkpui.

Goal erawh an khung thei phian, tun season Premier League-a goal khung tam ber ni mekin, goal 15 an khung tawh a ni. Competition hrang hranga an game hnuhnung 5 atangin goal 17 lai an khung hem mai.
A zawnin competition hrang hrangah vawi 5 an chak ta a, tun weekend hian Nottingham Forest an hmachhawn ang a, international break zawha an game hmasa berah Liverpool an hmachhawn ang.