Mikel Arteta chuan William Saliba chelh turin Arsenal chuan an tih theih ang ang an tih tur thu a sawi. 

Kum 22 mi hian Marseille-ah loan-in hun a hmang zuai a, a kir leh hnuin Gunners tan a tangkai hle. Mahse Emirates Stadium-ah kum 1 chiah contract a nei tawh. 

Nipui chawlh an hman hmain Arsenal chuan William Saliba leh a teammate Bukayo Saka-te contract thar ziahpui an duh a, an player tha pahnihte hi inremsiamna thar hmanga chawimawi an duh niin thuchhuah thenkhat chuan an tarlang.

William Saliba hi tun season-ah a lo kir leh thei dawn em? tih hriat a la ni lo a,  mahse inremna la awm chiah lo mah se sawihona chu an nei mek niin Mikel Arteta chuan a sawi. 

"Kan talent neih that ber hi chelh kan duh. A bik takin chhinchhiah phu player-te hi. Club-a a lo let leh hnuah Saliba chu a che tha em em a, lawmman hlan kan duh. Chu mi tur chuan hun tha kan dap ang. 

"Edu leh board-te hi contract thar chungchanga mawhphurtu an ni a, tunah chuan kan theih ang ang tih kan tum. Hun tha kan dap mek. Kan inbiakna leh kan inkar pawh a tha a, a hun lo herchhuak se a dik vek a nimai,"tiin Arteta chuan a sawi.

Arsenal chuan kum 19 hnua a vawikhat nan Premier League title an um leh mek a, an tum leh tur chu Newcastle an ni. Magpies chu table-ah 3-na niin, an that vanglai tak a ni bawk.