Arsenal chuan an defender Myles Lewis-Skelly red card chu hnuhkir leh a nih theih nan an khing let a, an hlawhtling dawn nge dawn lo tih erawh a la hriat loh.

Inrinni liamta khan Arsenal chuan si khat faiin Wolves an hneh. Kha match-ah khan referee Michael Oliver chuan red card sawi hlawh deuh a phawrh.

Minute 43-ah Wolves chuan counter attack neih an tum, mahse Myles Lewis-Skelly chuan Matt Doherty a titlu a, referee Michael Oliver chuan direct red card a phawrh. VAR-a duty Darren England pawhin Michael Oliver-a thutlukna hi a pawmpui nghal hmiah bawk.

Lewis-Skelly hian Arsenal game khelh hmabak pathum a hmaih dawn a, Premier League-a Manchester City an hmachhawn hunah te, Carabao Cup semi-final a Newcastle United an hmachhawn hunah leh, Premier League match-a Leicester City an hmachhawn hunah a inlan ve thei dawn lo a ni.

Inkhelh zawhah khan Arteta a lawm lo hle, referee thutlukna kha a dik lo hulhual niin a ngai. Michael Oliver-a thutlukna kha match official lo ni tawh te pawhin mak an ti a ni.

In-kherhthlu pangngai ang mai kha niin a lang a, yellow card phawrhna tur niin mi tam tak chuan an ngai. Mahse Michael Oliver khan rang takin direct red card a phawrh a nih kha.

Wolves an hmachhawn ṭum khan Joao Gomes chuan yellow card pahnih chawiin, hnawhchhuah a ni ve ta tho a. Arsenal defender Riccardo Calafiori chuan goal awm chhun a khung.

Inkhelh zawhah Arsenal supporter ṭhenkhatin referee Michael Oliver kha an vau niin a lang a, PGMOL chuan investigation an nei mek a ni.