Arsenal chuan Paris Saint-Germain atangin French left-back Lyvin Kurzawa chu lakluh tumin hma an la mek tih chanchinbu mite chuan an tarlanga, PSG nen pawh inbiakna an kalpui tawh nia tarlan a ni.

Kurzawa hi tun season zawh rual hian PSG-a a contract a tawp dawna, hemi a nih avang hian nipuia free-agent ni dawn mahse Arsenal chuan tun thlasik bazar chhung ngeiin kum 27 mi hi lakluh an duh niin a langa, kum nga daih contract ziahpui an inhuam niin French chanchinbu te chuan an tarlang.

Arsenal hian Kurzawa hi tun thla chhunga an lakluh hman loh pawhin nipui hunah a thlawna lakluh an tum dawna, a contract-ah thla ruk chiah a neih tawh avangin Kurzawa hi club dang nen an indawr thei tawha, pre-contract pawh a ziak lawk thei tawh.

Arsenal hian nikum nipui khan Celtic atangin Scottish left back Kieran Tierney chu pound maktaduai 25-in lalut mahse kum 22 mi hi a inhliam meka, a lo kir hun tur sawi theih a ni lo.

Kurzawa hi PSG-in Juan Bernat an lakluh hnua duh angin a khel tam lova, hemi a nih avang hian ani pawh hian PSG chhuahsan a hnial lo niin a langa, mahse Arsenal hian chuhpui tu neiin London club dang West Ham chuan Kurzawa hi an ngaihven ve hle nia tarlan a ni.

Kum 2015 khan Kurzawa hian PSG hi a zawma, PSG tan Ligue 1-ah vawi 83 inkhel tawh mahse tun season-ah erawh vawi nga bak league game-ah inkhel bul a la tan lo.

Kurzawa hi left-back ni mahse a tul chuan left wing lamah pawh a khel thei a, Arsenal hian tun thla chhunga an lei duh a nih chuan a manah PSG phut zat pound maktaduai 13.5 vel an sen a ngaih hmel a ni.