Viktor Gyokeres chungchangah Arsenal leh Sporting CP te chuan inremna an nei ṭep tawh niin The Athletic chuan a tarlang.

Gyokeres-a man chungchangah club pahnih te hi €63.5million (£54.8m; $74.2m) leh bonus €10m (£8.6m; $11.7m)-in a thuphungin an inrem nia report a ni. Inremna an neih theihna chhan chu Gyokeres-a agent hian agent fee a tih hniam vang nia sawi a ni bawk.

Hetih lai hian indawrna tur a la awm cheu, €63.5million hi engtiangin nge an inpek ang? tih chu club pahnih te la sawi dun leh tûr nia report a ni.

Club pahnih te hian inremna tluantling an nei teuh tawh hle a, tun kar chhung chuan engkim a fel hman rin a ni.

Gyokeres hian Arsenal pan a duh a, Sporting CP lam hian Manchester United tan kawng hawng mah se, Arsenal chuan inremna an neihpui thei dawn ta niin a lang.

Tun nipui bazar zet chu Arsenal an che na hle. Midfielders Martin Zubimendi leh Christian Norgaard te an la lut tawh a, goalkeeper Kepa Arrizabalaga bakah winger Noni Madueke an lei tawh bawk. Tin, vawiin lamah khan defender Cristhian Mosquera chu inremna an neihpui a, ani hian pre-season tour-ah Arsenal a zawm ve nghal ang.