Tun transfer a Arsenal elpui ber chu Chelsea hi an ni ti ila kan sawi sual awm lo ve. Tunah pawh Chelsea hian Brighton midfielder Moises Caicedo chu an dawr a, mahse Brighton hian an dawrna an hnawlsak hnuah Arsenal in a tharin hma an la ve leh dawn.

Caicedo hian Stamford Bridge lama kal hi a chak a, mahse a khelhna club Brighton leh Chelsea an indawr fuh loh hnuin Ecuador international hian nawr luih tumna erawh a nei lem lo.

Arsenal hian season leh atan midfielder thar lak luh an tum a, West Ham captain Declan Rice pawh hi an lak luh tum zinga lian ber a ni.

Rice hian nipui transfer lo awm turah hi chuan West Ham chhuahsan a duh tawh a, chuvang chuan kum 24 a upa hi Mikel Arteta chuan Emirates Stadium-a suan luh a tum.

Mahse, tunah hi chuan Arsenal hian midfielder lak luh tum pahnih an nei a, Caicedo emaw Everton midfielder Amadou Onana te zinga tu emaw zawk zawk hi chu lak luh hmasak phawt an tum a ni.

Chelsea hi chuan Benfica midfielder Enzo Fernandez chu tun kar chhunga dawr nawn leh turin an ruahman chho leh mek a, Caicedo hi chu season tawpa dawr chauh an tum thung.

Chelsea hian Caicedo manah hian pound 55m in Brighton hi an dawr zet a, mahse hei hi tun thla khan an lo hnawlsak. Chuvang chuan Caicedo pawh hian tun season chhung chu Brighton ah hian a cham a la inring.

Hetihlai hian Times chanchintharin a tarlan danin, Brighton hian Caicedo manah hian pound 100 million an chhiar dawn niin an tarlang a ni.