'Sergio Busquets thar' an tih mai, Real Sociedad star Martin Zubimendi chu Arsenal-in an enthla mek.

Gunners hian a contract neihlaia leichhuah theihna an dah an tinung ngam a, thlasik transfer hunah emaw, nakkum nipuiah emaw biak an tum tih thawm a awm. Spanish chanchinbute chuan Busquets nen an khaikhin der tawh a, Arsenal hian Thomas Partey elpui atan an duh tih thuthang a awm.

Arsenal hian nikum nipui lai khan an dawr hlawhchham a, an lakluh theihloh avangin Italy midfielder Jorginho an lei. Nipui bazar liamtaah khan Declan Rice leh Kai Havertz-te an lei leh bawk a, team tha zawk din tumin hma an la nasa hle.

Partey hi Juventus-in an duh tih thuthang a awm a, Zubimendi hian Emirates Stadium a pan lo ang tih a sawi theihloh. Kum 24 mi hi Barcelona boss Xavi Hernandez pawhin a enthla reng niin an sawi a, Arsenal hian a contract neihlaia leichhuah theihna an ziah chu an pe ngam niin Spanish chanchinbu Nacional-in an ziak.

La Liga season zo taah khan game 36 khelin goal li a thawkchhuak a, tun season-a Champions League an khelhna turin a tangkai hle. Gunners hian nakkum Pawlkut thlaa lakluh an duh niin an sawi a, hemi rual hian Partey thlahliam an pawi ti lo.

Ghana midfielder hi thal hliam vangin a chawl mek a, a dam that hunah hmun lai lum a chang lo anih chuan chhuah a duh. Nipui bazar inhawn lai khan chhuak tur anga sawi a tam a, mahse Arsenal-ah a cham chhunzawm a, tun season-a an game hmasa pathumah inkhel bul a tan.

Kum 30 mi hian an game hmasa pathumah first XI chang vek mah se, a position pangngaiah a khel lova, a position-a Declan Rice a awm tawh avangin Arsenal manager Mikel Arteta chuan right-back-ah a dah. A hliam hi ngaihtuahawm tak nilo mahse, Khuangchawi thlaah pawh ala dam lo maithei a, a dam hunah chhawrrim anih loh chuan inputchhuah mai a pawi tilo a ni.