Arsenal chuan Bologna atangin Riccardo Calafiori  an la lut fel ta a, kum 22 mi hian Arsenal-ah kum 5 chhung atan contract a ziak a, United States-a Arsenal pre-season tour a zawm nghal bawk.

Italian defender hian Arsenal-ah Jersey no. 33 a ha dawn a, a man hi €40m bakah add-ons €10m vel nia report a ni.

"Theihtawpin kan tang tlang a, kan la lut thei ta a ni. Riccardo, Arsenal chhungkuaah kan lo lawm lut a che," tiin Arsenal Sporting Director Edu chuan a sawi.

"Kan khelh dan leh kan team chakna tur nia kan hriat uluk takin kan zir chiang a, Riccardo hi kan mi duh tak a ni a, ani hi sang taka min vawrh thei tur player a ni.

"Kum 22 mi chauh a la ni a, heti chung hian theihna sang tak nei leh tawnhriat ngah tak a ni a, Arsenal team-ah a insiamrem vat dawn bawk a ni.

"Riccardo hian a ngelngheh zia club leh ram tan a lantir tawh a, season liamta khan Serie A player tha ber pakhat a ni a, tun Euro-ah pawh khan Italy tan tha takin a khel. Mikel leh coach dang te pawh Riccardo kan lak avang hian an phur a, kan jersey haa a inlan hun kan nghakhlel a ni," tiin Edu chuan a sawi bawk.

Calafiori hi a tir chuan left-back a ni a, mahse centre-half lamah a tawlh lut a, Basel defender hlui hi tun Euro-ah pawh khan a khel tha hle. Group Stage match zawng zawngah first XI a chang vek a, mahse suspend a nih avangin last 16-a Switzerland an hmachhawn tumin a inlan ve thei ta lo.

Calafiori hi tun nipui bazara Arsenal player lak luh pahnihna a ni a, season hmasa lama loan-a an hawh David Raya chu Arsenal hian Brentford atangin a nghetin an lo la lut tawh a ni.

An contract a zawh avangin Arsenal hian Mohamed Elneny leh Cedric Soares te an chhuahtir a, Albert Sambi Lokonga chu Sevilla-ah an kaltir a, Nuno Tavares pawh Lazio lamah an kaltir tawh bawk.