Manchester United manager Erik ten Hag chuan, tun season-ah United chuan tum khat chiah full-squad an la neih thu a sawi a, Arsenal erawhin full-squad an nei deuh reng thung niin a sawi bawk.

Dutch manager Ten Hag chuan, “Home-a Man City kan hneh chiah kha tun season-a full-squad kan neih awmchhun a ni a, a dangah erawh player inhliam emaw, dam lo emaw, suspend avang khel thei lo emaw kan la nei ziah. Arsenal erawh an squad pumpui hi chhawr theihin tun season-ah an awm deuh reng thung,” tiin a sawi.

United midfielder pahnih Christian Eriksen leh Donny van de Beek te chu, an inhliam avangin tun season-ah chhawr theih an ni tawh dawn lova, an midfielder dang Casemiro chu red card a hmuh avangin domestic game li khel thei lo tura hrem a ni mek bawk.

United hian zanin hian Europa League round of 16 second leg inkhelah Real Betis an tlawh dawn a, hemi atan hian an player pathum dang Alejandro Garnacho, Antony leh Anthony Martial te chu Spain-ah an zin ve lo.

Garnacho hi a inhliam avangin a chawl rei deuh dawna, Antony leh Martial te erawh rei tak chawl lo tura ngaih an ni. Ten Hag hian Manchester City an hneh tum khan full-squad an nei angin a sawi a, mahse he game-ah hian Jadan Sancho an chhawr thei lo.

Arsenal chu Premier League-ah an che tha hle a, mahse Ten Hag-a sawi anga full-squad nei deuh reng erawh an niin a lang lo. World Cup hnuah a inhliam avangin hun rei tak Gabriel Jesus an chhawr thei lova, Emile Smith Rowe pawh hun rei tak a inhliama, tunah Eddie Nketiah pawh a chawlh rei a ngai dawn a ni.