Belarus winger Alexander Hleb chuan tun season-ah a club hlui Arsenal-in nomawi pathum an chawi thei tih a sawi a, Gunners-a a khelhlai kha a huntawn tawha duhawm ber niin a sawi bawk.

Player hmalam eng nia sawi țhin Hleb hian kum 2005 June thla khan Stuttgart chhuahsanin Arsenal hi a zawm a, kum 2006 khan Champions League final luhpuiin kum 2008 khan Barcelona lamah a insuan.

A club hlui chungchang hi sawiin kum 35 mi Hleb chuan, "Wenger hian tum sang tak a nei ziah a. A player țhate a chelh a football hmuhnawm tak khelchhuakin an tumpuite an hnehsawh thei hle bawk."

"Tun season-ah Arsenal hian Premier League, FA Cup leh Champions League nomawi an chawi ka beisei a, hemi thlen tir tur hian theihna an nei a keipawhin ka țan zel ang." tiin a sawi.

Gunners chhuahsana Barcelona a zawm khan Pep Guardiola hnuaiah khelhna hmun a chang mang lo va, Stuttgart, Birmingham City leh Wolfsburg-ahte loan-in a khelchhuak a kum 2012 January thla khan Krylia Sovetov Samara-in an lalut.

Samara-ah hian thlaruk a khelh hnuin BATE Borisov chuan kum 2012 July thla khan an lalut ve thung a Belarusian Premier League-ah a champion pui nghal. (www.inkhel.com)

Kum 2014 January thla khan Turkish club Konyaspor-in an lalut veleh a, kum 2015 February thla khan Turkish club tho Gençlerbirliği-in an lalut leh a he club-ah hian tun thlengin ala khel.

Arsenal-a a awm hunlai chhui kirin Hleb chuan, "London-ah khan ka khelhțhat hunlai ber ka tawng a, ka huntawna ka chetțhat lai ber a ni bawk. Arsenal-a ka chamzui lo kha ka inchhir."

"Wenger hi ka pa ang mai anih bakah min ringtu a ni a, ka ngaihtuah let hian pawi ka ti țhin. Lehlamah chuan Barcelona pawh hi hman ațanga tun thlengin club tha an ni reng." tiin a sawi.

Belarusian Footballer of the Year-a vawiruk an thlan tawh Hleb hian Barcelona hi La Liga, Copa del Rey leh Champions League-ahte vawikhat țheuh a champion pui hman.

* Pic: Getty