2024-25 Premier League-a an match hmasa berah Arsenal chuan si hnih faiin Wolves an hneh a, Havertz leh Saka ten goal an khung.

Emirates Stadium-ah Arsenal game a hmuhnawm leh nghal pek hle. An nawr na a, chance hlauhawm tak tak an nei bawk. 

Goal hmasa zawk hi first half minute 25-a lut niin, mual dinglam sir atanga Bukayo Saka cross chu Havertz chuan kawh zetin a tauh goal.

Goal hnuhnung zawk a mawi em em bawk, second half minute 74-ah Saka chuan box dinglam sirah ball a la lut, near post lamah kawh mar pawtin a chhuih a, a goal mawi tak zet a ni.

Wolves chance hlauhawm ber chu first half tawp lamah niin, Larsen-a tauh chu David Raya chuan tha lutukin a lo save.

Wolves goalkeeper Sa a chetha a, Odegaar leh Saka te pet chu tha lutukin a lo dan sak ve ve bawk.

Arsenal tlarhnung han talbuai zauh tum nei mah se, inkhelh pumpui thlirin an khel tha tluan a, an attacking a na a, an nawr na em em. Mual dinglam sirah Saka a tal na leh pek hle bawk.

Declan Rice a inhliam palh hlauh mai, hun tawp dawn minute 5 a la awmin lak chhuah a ni a, a chawntha lamah harsatna a nei niin a lang.

Season liamta khan Arteta leh a hote hi pahnihna an ni leh a nih kha, tun season chu a chung bera awm tumin tan an la chho leh dawn. Player an nei tha a, an game pawh a hmuhnawm leh pek hle. 

Season bul tan a ni chauh a, champion tur sawi hun a la ni lo. Hetih lai hian Arsenal hi team tha leh khawng an ni tih an game hmasa ber atangin a lang nghal a, tun season chu a chung lamah an awm leh ngar ngar a rinawm nghal a ni.