Arsenal chuan contract thar chung changah Reiss Nelson chu inbiakpui an tum a, mahse inremna siam a la hnai lo niin English media te chuan an tarlang.

Kum eng emaw chen Gunners squad chuangliama a lo awm tawh hnuin, tun season-ah kum 23 mi hi Mikel Arteta player hlu em em pakhat a rawn ni nawlh mai. 

Inrinni khan Bournemouth lakah ropui takin Arsenal an comeback, kum 23 mi hi bench atanga lutin, goal khat a assist bakah chakna goal a khung bawk.

Kum 2004 hnuah Arsenal chuan Premier League title lak theihna hun tha an nei mek, Bournemouth lakah khan chak lo ngat selang chuan Manchester City khan an rawn hnaih viau tawh dawn.

Arteta ho te hi tun season-a an champion a nih chuan, Nelson hi a pawimawh reng tawh ngei ang le. Hetih lai hian, squad-a player dang te an tha hlawm si a, Gunners-ah hian a nghet tak tak thei ang em? hei erawh zawhna chhan harsa tak a ni.

Nelson-a contract kal lai hi kumin nipuia tawp tur a ni a, contract thar chung changah inbiakna neih mek a ni. Mahse an inremna thu hriat tur a la awm lo niin English media te chuan an tarlang.

London club thenkhat, Brentford, Crystal Palace leh West Ham chuan Nelson hi an ngaihven deuh nia tarlan a ni a. Burnley, Everton leh Southampton lam pawhin an ngaihven viau niin a lang.

Nelson hian France, Germany leh Italy-a club thenkhat atangin sawmna a dawng nual tawh. Mahse inrinnia hnehna an chan hnuah Nelson chuan Arsenal-a cham chu a tihmakmawh a nih thu a sawi.

North London-ah cham a duh leh duh loh zawh a ni a, "Ka duh a lawm. Hetah hian kum 8 mi ka nih atangin ka awm tawh a, Arsenal hi ka hriat chhun a ni. Stadium pawh kan hlat lo a, ka chhungte zawng zawng pawh an awm. Chuvang chuan heta awm hi ka duh a ni.

"Kum 8 ka nih atangin ka awm tawh a, tunah kum 23 ka ni tawh. Ka awm rei tawh khawp mai, keimah tawp hi Arsenal ka ni.

"Game ka khel theite hi ka lawm a, inhliam hi chu thil liantham a ni lo. Hmalam hun hi ka thlir ve a, club tan hian game tam zawk ka la khelh theih ngei ka beisei," tiin Nelson chuan a chhang a ni.