Sir Alex Ferguson-a hunlai khan Manchester United chuan hun tawp lamah goal an khung a, hnehna an chang fo a nih kha. Kha kha Fergie time tiin an phuah a, tun season zet chu Liverpool-in hun tawp lamah goal an khung ngun ta hle.
Arne Time tiin media te chuan an sawi chho mek a, tun season Premier League leh Champions League match-ah Liverpool chuan an khingpui an hneh vek a, Nilaini zan zanlai Champions League match-ah 3-2 in Atletico Madrid an hneh.
Inkhelh tir lamah Liverpool-in goal hnih an khung, hei hi Llorente chuan rul ve vein, 2-2 in an inhnehtawk tawh dawm emaw tih hnu, added time 90+2 minute-ah Van Dijk chuan Liverpool chakna goal a tauh lut a, 3-2 in Liverpool chuan hnehna an chang ta a ni.
Anfield-a inkhel hmuhnawm takah Alexander Isak chuan inkhelh bul a tan a, goal khung lo mah se hmatawng lamah a tangkai hle. Goal hmasa ber hi minute 4-a lut a ni a, Ryan Gravenberch-a free kick hlawhchhuah chu Mo Salah chuan petin, ani hian Robertson a pet per a, Atletico goal-ah a lut.
Minute 6-naah Salah chuan goal a khung chhunzawm. Ryan Gravenberch-a ball pek tha tak chu box veilam sir tawt tak kar atangin a chhuih goal a, si hnih faiin Liverpool chuan hma an hruai char char a, first half tawp dawn 45+3 minute-ah Maros Llorente chuan an siphurh a sut then.
Liverpool hian chance hlauhawm tak tak an nei a, goal thumna Mo Salah hmangin an khung teuh hle. Writz-a ball pek tha tak chu Salah chuan dawngin, goalkeeper chiah a hmachhawn tawh tihin Atletico goal ban a pet per dawp.
Minute 81-ah Llorente chuan a goal hnihna leh an siphurh rulhna mawi lutukin a chhuih lut. Box pawn chiah atanga a volley chu Alexis Mac Allister chuan a lo dang kawi deuh bawk nen, Liverpool goal-ah kawh zetin a thlawk lut, 2-2 a ni a, an inhnehtawk tawh mai dawn niin a lang.
Hun tawp dawn tak tak added time-ah Liverpool chuan corner an hlawhchhuak a, Dominik Szoboszlai-a corner pet chu Virgil van Dijk chuan hla tak atangin a tauh, Atletico goal kil sirah a lut a, 3-2 in Liverpool chuan hnehna an chang ta a ni.
Tun season zet chu Liverpool hian chak an duh tih a lang chiang, hun tawp dawnah goal an khung chho ta mawlh mawlh mai. Kar liamta mai khan Burnley lakah hun tawp dawnah goal an khung. Bournemouth lakah khan Chiesa khan minute 88-ah goal a khung a, 3-2 a Newcastle an hneh khan Ngumoha chuan 100 minute-ah chakna goal a khung a, Arsenal laka an chakna pawh minute 83-a Dominik Szoboszlai khung a ni.
Hun tawp dawn tak takah Atletico Madrid head coach Simeone chu hnawhchhuah a ni a, Liverpool supporter te nen an inbakkaih deuh a, hei vang hian referee chuan red card a phawrh.
Chakna goal Van Dijk-a'n a khung zawh hlima thil thleng kha niin, Simeone chuan, "Inkhelh chhung zawngin hnung lam atangin min au nawmnah char char. Engmah ka sawi lem lo, ka tuar ngawt ngawt.
"Hun tawp dawnah vawi khat an huat zawng angin ka khawsa ve a, ka chet dan kha ngaihdam theih chu a ni lo. Mahse inkhelh chhung zawngin min au nawmnah a. Ka tuar thei tawh ngang lo a ni," tiin Spanish broadcaster Movistar hnenah a sawi.
Tun inrinni hian Merseyside Derby khelh a ni dawn a, Liverpool chuan Anfield-ah Everton an hmachhawn ang. Chumi zawhah Carabao Cup third round-ah Liverpool hian Championship club Southampton an hmachhawn leh dawn a ni.