Tottenham chuan Feyenoord manager Arne Slot chu an manager thar ni turin dawr mah se, Slot hi a inhnukdawk a, Dutch coach hian Tottenham hi a enkawl dawn lo.

Tottenham hian March thla khan Italian manager Antonio Conte an ban a, Conte an ban hnu hian a assistant Cristian Stellini chu interim manager angin an chhawr a, mahse Stellini hnuaiah an chet that loh avangin Stellini hi ban ve lehin, tunah hian an midfielder hlui Ryan Mason chuan Tottenham hi a enkawl mek.

Mason hian tun season tawp thleng Tottenham hi a enkawl dawn a, Tottenham season thara an manager tur zawng mekin, tun dinhmunah tu mah inremna an la neihpui thei rih lo niin a lang.

Slot hian tun season-ah Feyenoord hi Eredivisie-ah a champion pui a, Tottenham zawm tura Feyenoord a chhuahsan rinawm hman viau mah se, Feyenoord-ah hian contract thar a ziah a rinawm leh ta zawk a ni.

Slot hian AZ Alkmaar-ah a management career bul a tan a, kum 2020 December thla khan AZ a chhuahsan hnuah Feyenoord hi a enkawl a, kum 44 mi hi kumin March thla khan Leeds United pawh an lo dawr hlawhchham tawh.

Tottenham hian manager eng emaw zat an bia a, Bayern Munich manager hlui Julian Nagelsmann pawh inbiakna neihpui mah se, inremna an nei thei lova, Burnley manager Vincent Kompany leh Brighton manager Roberto de Zerbi te pawh an dawr hlawhchham tawh niin chanchinbu mite chuan an tarlang a ni.