Argentina in Lionel Scaloni hnuaiah Copa America leh World Cup an chawi hnuin an head-coach a la nih chhunzawm zel tur thu Argentine Football Association (AFA) president Claudio Tapia chuan a sawi.

Argentina hian nikum lama Copa America champion an nihna ti ropui zual turin Qatar World Cup 2022 final-ah France nen inhmachhawnin, hun pangngaiah leh extra-time ah 3-3 in an inhnehtawk a, penalty shoot-out hmanga France hnehin an champion a ni.

Inelna pahniha an champion zawn avang hian Argentina boss Scaloni hi Brazil boss hlui te pahnih Mario Zagallo leh Carlos Alberto Parreira te hnuah he inelna pahniha champion zawnpui thei pathumna a ni ve leh ta chiah.

Kum 44 a upa Scaloni hian Argentina ah hian tun kar tawp thleng chauh contract a nei tawh a, hemi avang hian club inelna lama a luh mai ring an tam hle. Mahse Tapia chuan chutiang a thlen loh tur thu chu a sawi a ni.

AFA chief Tapia chuan chanchinbu mite hnenah, “Argentina team-a head coach a nih chhunzawm zel hi ka ring.

“Kan thu a rual a, inchibaiin ‘aw’ kan ti tawn tawh a ni. Tunah chuan a zinkual mek a, mahse a rawn haw veleh he thu hi kan sawi chiang ang,” tiin a sawi.

Scaloni hian July 2018 atang khan Argentina hi a enkawl tan a, kumin kum tir mai khan Finalissima-ah European champion lai Italy hnehin Argentina hi a lo champion pui tawh bawk.

Argentina lo enkawl tawhtu Jorge Sampaoli khan Russia 2018 World Cup-ah khan Argentina chu round of 16-ah France hneh loin a tlakpui a, hemi avang hian Scaloni hian a thlak a ni.