Italy's anti-doping agency te chuan Paul Pogba chu hremna na thei ang ber, kum 4 chhung hrem an duh thu Juventus an hrilh.

Kan tarlan thin tawh angin, kumin August thla khan Pogba chu testosterone supplements a hman avangin doping test-ah a positive a, second sample chu October thla khan a positive leh bawk. Hei vang hian Italy's anti-doping agency te chuan tum reng vanga heng damdawi hmangah Pogba an ngai.

"Anti-doping lam atangin ningani zing khan lehkha kan dawng a, kum 4 chhung Pogba hrem an duh thu an rawn tarlang," tiin Juventus chuan AFP an hrilh.

Pogba hi insawifiahna hun te a nei dawn a. Tin, a la khing let thei dawn bawk. Hengah hian a tum reng vang ni loa hmang a ni tih finfiah a nih chuan a hremna hi thla 3 emaw vel lekah tihhniam theih a ni dawn.

Hetih lai hian finfiahna hrang hrang hmanga Pogba hian a tum reng vanga heng damdawi hi a hmang nia hriat a nih chuan, kum 4 chhung inkhel thei lova hrem a ni ngei dawn a ni.

Juve manager Massimiliano Allegri  chu Pogba chungchang zawh a ni a, chiang fakin a player chungchang hi a sawi tha duh lo.

"Pogba chungchang chu sawi tur ka nei lo. Kan inbe reng a, he a thubuai hi tawp vat se kan duh, kan inbe chhunzawm zel ang," tiin a sawi.

Anti-doping a paltlang loh avangin Juventus chuan Frenchman hi September thla atang khan a lo hrem tawh a, a thubuai chinfel a nih hmal chu a inkhel thei rih dawn lo a ni.