Liverpool chuan an left-back Andy Robertson chu vawiin khan contract thar an ziahpui a, Robertson-a contract thar hian kum 2026 June thla thleng a daih a ni.

Scotland captain Robertson chuan Anfield-a contract thar a ziah chungchang sawiin, “He club-ah hian a theih anga rei cham ka duh a, kei leh ka chhung te hi kan hlim reng a ni. Kan inbengbel a, he club hi kan ngaina em em e, ka zinkawng ka chhunzawm thei tur hi a lawmawm hle a ni,” a ti.

Liverpool hian kum 27 mi Robertson hi Hull City atangin kum 2017 July thla khan an lei a, a manah pound maktaduai 8 chiah sengin, an tifuh cher cher hle.

Robertson hian Liverpool tan game 177 a khel tawh a, Premier League, UEFA Champions League, FIFA Club World Cup leh UEFA Super Cup-te a chawi tawh a ni.

Robertson hi Celtic leh Queen’s Park academy chhuak a ni a, kum 2013 khan Scottish club Dundee United chuan Scottish club Queen’s Park atang hian an lalut a, kum 2014 khan Hull-in an lalut ve leh a ni.