Liverpool chuan Anfield-ah Arsenal mikhualin, si li faiin an mikhual te hi an sawp a, Salah a khel ropui hle a, goal khat a khung bakah goal dang a siam bawk.
Liverpool tan hian Firmino, Sadio Mane, Salah leh bench atanga lut Sturridge te chuan goal khat theuh an khung a, Arsenal hian inkhelh chhungin shots on target an nei lo hrim hrim.
October ni 5, 2014-a Chelsea an hmachhawn tum khan goal zawna shots an nei lova, khami hnu Premier league game-a shots on target an neih loh leh hmasak ber game ni nghe nghe.
Liverpool 4-0 Arsenal
(Firmino 17', Mane 40', Salah 57', Sturridge 77')
PLAYER RATINGS (data source : opta)
LIVERPOOL: Karius 6; Gomez 7, Lovren 7, Matip 7, Moreno 6; Wijnaldum 7, Can 9, Henderson 7; Mane 9, Salah 9, Firmino 9. Subs: Sturridge 6, Milner 6, Grujic n/a.
ARSENAL: Cech 7; Holding 6, Koscielny 6, Monreal 5; Bellerin 5, Ramsey 5, Xhaka 5, Oxlade-Chamberlain 5; Ozil 5, Sanchez 5; Welbeck 5. Subs: Coquelin 5, Lacazette 6, Giroud 6.
Goal hmasa ber hi 17 mins-a lut a ni a, mual dinglam sir atanga Joe Gomez cross tha zet chu Roberto Firmino chuan a tauh goal. First half tawp dawn minute 5 a la awm tihin Mane chuan goal mawi tak a khung a, mual veilam sirah ball khalhin, box chhung a luhpui hnuah a ke dinglamin a thuai goal, goal mawi tak a ni chiang e.
Second half-ah goal hnih dang a lut leh a, Salah chuan halfway line vela Bellerin ball chu chhuhsakin, 70 yards vela thui ball a khalh hnuin cool takin a pet goal. Hun tawp dawn minute 13 vel a la awm tihin bench atanga lut Sturridge chuan Salah cross tha zet chu a tauh goal leh a, si li faiin Liverpool chuan hnehna an chang ta a ni.
He match-ah hian Salah a tal na hle a, man of the match a ni nghe nghe, Cech chuan Salah shot hi vawi li lai a save a, second half tir lamah Salah shot Cech-a save per chu Henderson chuan a pet goal dawn emaw tih laiin box chhung atangin a pet over.
Mane pawhin goal hnih a khung teuh hle a, second half hun tawp lama a shot chu Cech chuan khawih mahse goal-ah a lum lut teuh hle, Bellerin a lo awm hlauh a, ani chuan a pet out hlauh a ni.
Inkhelh pumpui thlirin Arsenal hian Liverpool an khan lo hle a, Wenger chuan Lacazette bench-a thuttirin Welbeck a start tir, tin chhuak mai tur nia sawi Sanchez pawh Wenger chuan a start tir, mahse awmzia a nei lo chiang kher mai. Sanchez hian chhuah a duh avangin a khel tha peih lo ni hiala ngaih theiha chhiain a khel, Henry phei chuan, "Khatianga a khel dawn a nih chuan chhuak vat rawh se," tiin a sawi nghe nghe.
Liverpool tan Coutinho chu a la inlan lo tluang zel a, Coutinho tello pawhin Liverpool hian game ropui tak an khel thei tih a chiang, an attacking a pui rem rem hle, a bik takin Salah a tal na hle a, a tlanchakin chance a siam nual nghe nghe. Liverpool hian an duhdan taka an khel chhuak thei a nih chuan team tha tak an ni chho dawn chiang a ni.
Pictures credit : Reuters