Anderson Silva chu Thawhlehni khan Los Angeles Convention Center-ah mi dang thahnem takte nen America khua leh tui nihna an pe.

Brazilian fighter Anderson ‘Spider’ Silva hi mi sang chuang fe te nen a rualin America khua leh tui nihna hi an pe a. Silva hian a fapa kum 20-a upa Kalyl leh a fanu kum 23-a upa Kaory te nen thu an tiam a ni.

U.S. Citizenship and Immigration Services chuan khawvel ram hrang hrang atanga an rama awm mi 8,000 chuang zette chu khua leh tui nihna hi an pe thar a. Heng mi chi hrang hrang zingah hian Mexico, Philippines leh China atanga America rama lut an thahnem deuh ber a ni.

Khua leh tuia an lakluhnaah hian mi tam zawk chuan US flag an keng a, an lak luh laia thu an tiam zawhah an flag ken chu an vai a, lawmpuina thawm a lo ri hluah hluah bawk a. Silva te chhungkua pawhin America hnam hla an sak chu zawmin, a awm zawnah a kut dahin a zai uar hle.

Kum 10 vel kalta atang khan Anderson Silva hian America khua leh tui nih hi a lo dil tawh thin a, thuneitute chuan an pawmsak mai lo a, tunah chuan a duhthusam chu a thleng ve ta a ni.

Silva chuan, “US khua leh tui ka ni ve thei ta hi a lawmawm tak zet a. Kei leh ka chhungte tan chuan hun pawimawh leh ropui tak a ni,” a ti.

“USA hian ka tan thil tam tak a lo ti tawh a, tunah chuan he ram tan hian ka theihna te hi ka hman let ve a hun tawh a ni,” a ti bawk.

Kum 44-a upa Anderson Silva hi kum 10 chuang chu Los Angeles khawpuiah a lo awm ve tawh a, a fate pawh kum 7 chuang chu an awm tawh bawk a. Brazilian fighter hi UFC middleweight champion ni rei thei ber niin, 2006 leh 2013 inkarah khan a zawnin vawi 16 ngawt mai a chak thei a. Tunah hian UFC middleweight ranking-ah 15-na a ni mek.

Spider Silva hi Sao Paulo, Brazil-ah a piang a, Curitiba-ah a ni te bulah a seilian thung a. A ni pasal chu Curitiba police officer niin, a naupan lai hun hi an hnenah hian a hmang chho a. Brazil chu a zah thu sawiin, American a ni thei chu lawmawm a tih thu a sawi a ni.

“Brazil ramah ka chhungte an awm a, ka nu leh ka unaute chu an la awm vek a. Amaherawhchu, America hi ka ram tak tak a ni tawh a ni,” tiin Silva chuan a sawi.

Silva nupui Dayane bakah an fa dang, kum 14-a upa Joao, kum 22-a upa Gabriel leh kum 18-a upa Kauana te pawh an lak luhnaah hian an tel a. Anni hi chu America khua leh tuia an lak luh hmain hun eng emaw chen an la enthla deuh dawn a ni.