Real Madrid chuan an manager chhawr lai Carlo Ancelotti thlaktu atan an player hlui Xabi Alonso an hual fel tawh niin Spanish chanchinbu te chuan an tarlang.

Ancelotti hian tun season bak Real Madrid a enkawl tawh dawn lova, tun season zawh ruala a contract a hman zawh hunah Brazil national team a enkawl zawm dawn a ni.

Real hian nakkuma an manager thar tur an dap a, Bayer Leverkusen manager Alonso chu an mi duh a nih thu tarlan a ni a, mimal thilah inremna pawh an nei tawh niin chanchinbu thenkhat chuan an ziak.

Kum 2009 khan Real Madrid hian Liverpool atangin Alonso hi an lei a, a manah pound maktaduai 30 an seng. Real Madrid-a a awm chhungin kum 41 mi hian Los Blancos tan hian game 236 a khel a, Champions League, La Liga leh Copa del Rey te a chawi.

Kum 2014 khan Real Madrid chhuahsanin Alonso hian Bayern Munich a zawm a, Bayern tana kum thum a khelh hnuah inkhelh a chawlhsan thu puangin, a kum leh atangin coaching lam a luhchilh a, Real Madrid youth team a enkawl.

Kum 2019 khan Real Sociadad B enkawl lehin, kum 2022 khan a vawi khat nan first team manager niin Leverkusen a enkawl a, Alonso enkawlna hnuaiah German club hian nasa takin hma an sawn. August thla mai khan Leverkusen hian Alonso hi kum 2026 June thla thleng daih contract thar an ziahpui a, Real hian an duh a nih chuan Leverkusen hnenah zangnadawmna eng emaw zat an pek a ngaih a rinawm a ni.