Manchester United leh Lecce te chu Patrick Dorgu man chungchangah an inrem ta. Serie A club hian €40m (£33.6m) vel chhiar mah se, an indawr fe hnuah an tawlh hniam ta a ni.

United leh Lecce te hi Dorgu manah €30million (£25.2m) bakah add-ons €5m (£4.2m)-in an inrem ta tih The Athletic chuan a tarlang a ni.

Contract chungchang leh tihfel ngai tur neuh neuh, inremna siam fel tur thenkhat a la awm a, engtikah nge Dorgu hian medical nei turin Carrington a pan dawn tih erawh a la chiang thei lo thung.

Engkim peih fel a nih hnuah chuan, he full-back kum 20 mi Patrick Dorgu hi Ruben Amorim-a player lak luh hmasak ber a ni dawn ta a ni.

Erik ten Hag an ban hnuah Amorim an la, United team ropui takin a la kaihruai thei lo. Table-ah pawh a mawng lamah an awm ve reng. Amorim hian 3-4-2-1 formation a hmang thin a, heta hman theih tur player hi United hian an dap kual a ni ber.

Dorgu hi ke veilam hmang thiam a ni a, full-back tha tak nia sawi a ni bawk. Luke Shaw a inhliam reng avang leh Tyrell Malacia a damkawr avangin Amorim chuan veilamah Diogo Dalot a chhawr thin. 

Dinglamah chuan Amad a chhawr tangkai hle a, ani pawh hi ke veilam hmang thiam a ni. Tin, Mazraoui pawh Amorim chuan dinglamah a chhawr nasa bawk.

A duhthusam angin team a la remkhawm tak tak thei lo a, a mamawh em em full back tha tak Amorim chuan a la thei dawn ta niin a lang.

Dorgu hian kum 2023 khan Nordsjaelland atangin Lecce a zawm a, nikum October thla khan contract thar ziakin, a contract hian kum 2028 thleng a daih.

Dane full-back hian tun season-ah Lecce tan competition hrang hrangah game 23 a khel tawh a, goal 3 khung tawhin assist vawi khat a nei tawh bawk.