* Ruben Amorim chuan season thar lo awm turah hian Man United manager a nih chhunzawm tur thu United squad  hrilh.

* Ruben Amorim chuan Europa League final khelh zawha phun nasa em em Alejandro Garnacho chu United chhuahsan turin a hrilh.

Europa League final-a Tottenham an hneh loh hnuin Ruben Amorim chuan United chhuahsan a inpeih reng thu a sawi. "United-a danglamna siam thei ka nih loh chuan compensation pawh la loin ka chhuak mai ang. Chutih laiin Club hotute'n min la ring tawk a nih erawh chuan ka chhuak lo ang," tiin a sawi a nih kha.

The Athletic-in a tarlan dan chuan, inrinni khan Carrington training ground-ah Ruben Amorim chuan thu a sawi a, season tharah pawh Manchester United boss a nih chhunzawm tur thu a sawi chiang. Hetih lai hian Garnacho erawh a chhuah theih tur thu a hrilh nghal bawk.

Bilbao-ah khan Garnacho chu minute 71-ah luhtir chauh a ni a, khami avang khan Argentine forward hi a thinrim hle. Interview a neihnaah Garnacho chuan, "Tu tan pawh tun season zet hi chu a hrehawm a ni, season chhe tak kan hmang, final-ah pawh kan chak lo a, league-ah pawh kan che chhe hle a, tumah kan hneh thei lo. Chu chu thudik a ni.

"Final khelh hma zawngin min chhawr hnem em em a, final-ah erawh minute 20 chauh ka khel. Ka hrethiam lo a ni, nipuiah hlim taka hun hman ka tum a, ka hma hun tur chungchang chu kan la hre chhunzawm zel ang chu," tiin a sawi.

Hetianga a sawi avang hian Ruben Amorim chu a thinrim hle nia report a ni a, Premier League match hnuhnung ber an inbuatsaihnaah Garnacho chu a duh chuan a chhuah theih tur thu Amorim hian a hrilh niin The Athletic chuan a tarlang a ni.