Press Conference a neih apiangin Ruben Amorim chu Marcus Rashford-a chungchang zawh a ni ṭhin a, Fulham an hneh hlimin Amorim hian Rashford chungchang chu a ruh lang rawtin a puang chiang ta.

Amorim hian training-naa tiṭha peih lo ai chuan, a goalkeeping coach kum 63 chu inkhel tur pawha a thlan zawk thu a sawi chhuak hmiah mai.

Manchester Derby khelh a nih hnu khan match 11 lai chu Ruben hian Rashford a thlauhthla tawh. Kum 27 mi hi tun thlasik bazarah hian chhuahtir tumin United chuan hma an la mek a, Rashford hi a chhuak lo a nih pawhin Amirom chuan a ngaihdan chu a sawhsawn loh tur thu a sawi tel bawk.

Pathianni zan zanlaiah khan Manchester United chuan Fulham an tlawh a, Lisandro Martinez-a goal khat hmangin hnehna an chang. Kha match-ah pawh khan Amorim chuan squad-ah Rashford a telh lo.

Pawn lama a khawsak dan avangin Amorim hian Rashford hi a thlauhthla nia report a ni a, Everton an hmachhawn hma chiah zanah bar-ah hun a hmang a, khami chungchangah khan Rashford chuan a pu hnenah hian dawt a hrilh nia sawi a ni bawk.

Fulham an hneh hnuin Amorim chu Rashford chungchang zawh a ni leh a, Amorim chuan, "Rashford ka thlauhthlak chhan chu a la ngai reng. A chhan ber chu training-naah theihtawp a chhuah lo a ni.

"Footballer chuan training a la thutak tur a ni a, a inthlak danglam lo a nih chuan, kei pawh ka inthlak danglam dawn bik lo.

"Amah mai a ni lo, player dang pawh an ni vek. Training naah theihtawp an chhuah tur a ni. Player chhawr tur hi kan nei nual alawm, kan game-ah pawh in hmuh ṭhin kha.

"Player tiṭha peih lo ai chuan, kan goalkeeping coach kum 63 mi Jorge Vital pawh hi inkhel turin ka ko mai ang," tiin a sawi.

Rashford hi United chuan loan-a chhuahtir an phal nia thu a than khan, AC Milan, Juventus, Borussia Dortmund leh Barcelona te chuan an ngaihven.

Barcelona hi Rashford hnaih bertu nia ngaih a ni a, amah Rashford ngei pawhin Nou Camp lam pan a hreh lo. Mahse a hlawh chungchangah an inrem hleithei lo niin The Athletic chuan a tarlang a ni.