Manchester United chuan kum 23 mi Belgian goalkeeper Senne Lammens chu £18.1m sengin an lei a, an goalkeeper Andre Onana erawh Turkish club Trabzonspor lamah loan-in an chhuantir.
Cameroon international hian kum 2028 thleng Old Trafford-ah contract la nei mah se, Ruben Amorim a awm chhung chu Manchester United-ah hmun a chan a rinawm tawh loh. Hei vang hian Onana chuan Manchester United a chhuahsan hlen a rinawm hle.
United boss Amorim chuan Andre Onana a chhuahtir chhan dik tak chu a chetthat tawk loh vang a nih thu a sawi a, goalkeeper tha tak erawh a nih thu a sawi tel bawk.
"Thiamna leh theihna sang tak chu a nei alawm, hetih lai hian United-ah erawh pressure a sang em em a, thil tihdanglam kan mamawh a ni ber mai.
"Onana that lohna sawi fak tur a awm lem lo, a che chhe rih a ni mai chauh. A vanduai a, ani tan pawh a hrehawm ang a, keini tan pawh a hrehawm a ni.
"Andre hi tha taka khel chho turin duhsakna ka hlan a, thiamna leh theihna a nei a, chutih laiin kan awmna hmun kan thlak angin keini pawh kan inthlak danglam ve zel a ngai a ni," tiin Ruben Amorim chuan a sawi.
Pathianni zan hian Premier League match-ah Manchester City an hmachhawn dawn. United chuan goalkeeper thar Lammens nei tawh mah se, Altay Bayindir chuan goal a ven tur thu Amorim chuan a sawi chiang.
Bayindir hian tun season Premier League match thum a khel tawh a, Arsenal leh Burnley an hmachhawn khan tihsual lian tak a nei a, hetih lai hian Lammens ai chuan Premier League-ah tawnhriat a ngah zawk avangin Amorim chuan Etihad Stadium-ah chhawr a tum thu a sawi chiang a ni.
"Lammens hi goalkeeper tha tak a nei a, kum rei tak chhung kan chhawr thei dawn. Chutih laiin league dangah a rawn insawn a, ram dang a nih tawh bakah ball hran a rawn hmang dawn. Chuvang chuan Altay hian goal a veng chhunzawm rih dawn a ni," tiin Amorim chuan a sawi bawk.
Mason Mount, Matheus Cunha leh Diogo Dalot te chuan Manchester City an hmachhawn thei dawn lo a, 3-2 a Burnley an hneh tum khan Cunha chuan hamstring hliam a nei a, Mount pawh second half-ah thlak a ni bawk. Ram tana a fehchhuahnaah Dalot pawh a inhliam bawk.