NBA Academy India atanga zir chhuak, Mizo tlangval Lalhnehpuia Chhakchhuak chu Chicago, Illinois-a North Park University-ah a inziak lut a, NBA Academy India atanga inzir chhuak zingah chuan USA lama basketball kaihhnawih thila high school emaw, college emaw zawm thei parukna a ni.
Point guard Lalhnehpuia Chhakchhuak hi 2017-18 Reliance Foundation Jr. NBA program ah khan a tel a, kha mi atang khan a kal tluang chho a, ACG-NBA Jump program lama mit la pawl a ni bawk a, 2018 atangin NBA Academy India a zawm tan a. 2018 kumah khan Australia rama NBA Academy Games neihah a tel a, 2019 ah khan USA-a NBA Academy Games neihah a tel leh bawk a. Hei bakah hian 2019 ah khan San Diego-a Point Loma Nazarene Team Camp-ah pawh a tel a ni.
Kum 15 a nih atanga a khelhna MSL team Hollow player thin Lalhnehpuia hi Mizoram Basketball Association (MBBA) huang chhungah a inhmang chho nasa a, anni hi a kaihruaitu hmasa leh a bulpui ber an ni a tih theih a. Mizoram aiawha Sub-Junior leh Junior level vela a feh chhuahnaah te pawh NBA scout te chuan an lo veh tan tawh a ni.
North Park University a zawm thei tur chu lawmawm a tih thu sawiin Lalhnehpuia chuan, “Ka zin kawng duh tak zawh thei tura ke ka pen tan hi lawmawm ka ti a, chutiang ti thei tura North Park University zawm theihna hun tha ka nei hi ka lawm a, luh vat vat a nghahhlelhawm tawh khawp mai,” a ti.
“Hetiang dinhmun ka thlen theih chhan hi NBA Academy India lama coaching staff te kaihhruaina te leh ka chhungte min thlawpna vang a ni tih ka hria a, an tel lo chuan hetiang hi ka thleng thei hauh lo ang,” a ti bawk.
North Park head coach Thomas Slyder chuan, “Lalhnehpuia Chhakchhuak te ang player kan la lut thei hi a phurawm kan ti hle a. A nihna takah chuan amah a sang tha a, guard position-a khel tur chuan hetianga sang tha hi kan duhthusam a ni,” a ti.
“Kan hnena a awm chhungin hma a sawn belh zel ang a, chutiang hunah chuan kan player pawimawh tak ni chho thei ngei turin kan beisei a. A che rang a, a kut leh ke pawh a rang thawkhat bawk a, hetiang hi guard ni tura thil pawimawh tak mai a ni a, thil tha tak a ni,” a ti bawk.
Lalhnehpuia bakah hian NBA Academy India zirlai dang panga te chuan US lama basketball khelh an lo thlang tawh bawk a. A hmaa hetianga thutlukna lo siam tawhte chu Harshwardhan Tomar (KEBA Preparatory School), Jagshaanbir Singh (Golden State Prep, Point Park University), Pranav Prince (First Love Christian Academy), Amaan Sandhu (First Love Christian Academy) leh Riyanshu Negi (DME Sports Academy) te an ni.
Pu Aldrin Lallawmzuala fapa, Zarkawt tlangval hian pawl 12 result a nghak mek a, North Park University hian USA ram chhunga college hrang hrangte basketball hmanga an inelna sang bera point guard ni turin Lalhnehpuia Chhakchhuak hi an duh a, hei vanga rawn thlang hi an ni.
NBA Academy India graduate zingah chuan Princepal Singh kha professional contract ziak hmasa ber niin, NBA G League Ignite ah contract a ziak a. NBA Academy India hi India ram chhunga basketball zirna hmun changtlung em em mai niin, ACG nen inkawpin hetianga zirna changtlung awm hmasa ber hi a ni.