Alonso-a’n Chelsea hnenah chhuah a dil

24th May 2022, 09:05PM

Chelsea defender Marcos Alonso chuan Chelsea hnenah chhuah a dil niin chanchinbu mite chuan an tarlang a, mahse ziakin chhuah dilna hi a la thehlut lo nia tarlan a ni bawk.

Barcelona chuan kum 31 mi hi lakluh an duh a, mimal thilah pawh Barcelona leh Alonso te hian inremna an nei tawh niin chanchinbu mite chuan an tarlang.

Chelsea hian Alonso hi chhuah an phalsak a nih pawhin Barcelona hian an lei a ngai dawn a, mahse Stamford Bridge-ah kum khat daih chiah contract a neih tawh avangin Barcelona hian a manah sum sen tam an tum lo nia sawi a ni.

Ben Chilwell a dam leh tawh bawk nen season tharah Chelsea hian Alonso hi an chhawr tam a rinawm tawh lova, hemi avang hian Alonso pawh hian chhuah a duh niin a lang a, Chelsea hian a phu tawka hralh an hreh a rinawm loh bawk.

Season khar ni khan Chilwell chu hun rei tak a inhliam hnuah Chelsea tan a inlan a, Chelsea hian season tharah Lyon-a loan-a chhuak Emerson chu kawl an tum tawh bawk nen Alonso hi Barcelona-in an lak theih a rinawm hle a ni.

Copyright © inkhel.com 2024. All rights reserved.