T Mobile Arena, Las Vegas, USA-ah UFC neih zawh a ni a, featherweight lalpa Alexander Volkanovski chuan Yair Rodriguez a sawp hrep hnuin third round technical knockout-in a hneh. Heti hian Volkanovski hian a vawi 5 nan a featherweight kawnghren a humhim ta chiah a, a tiatpuia khawvela fighter tha ber anih zia a lantir nawn leh.
Mipui sing chuang pungkhawm hmaah Volkanovski an bul a tan tha a, round hmasa ber atang titlu nghalin thawh leh tumin Rodriguez insiamrem tum mah se a titlu nawn mawlh mawlh a ni ber. Hnuai lam atang Rodriguez chuan a kiu hmangin a rawn nghawk fuh ve leh thin bawk a, champion lai Volkanovski pawhin a duh ang ngawtin chiang takin a khawih fuh hlei thei biklo.
Second round an thlen chhoh hnuin Volkanovski bawk chungnung lehin a titlu leh. Hetah zet zawng a kiu leh kuttum hmangin a chhu zui leh mawlh mawlh a, Rodriguez mitko atang thisen rawn chhuakin a khel tluan thei hram a ni ber. Round thumna ah Rodriguez chuan a pêt fuh ta mawlh mawlh a, champion tawnhriat ngah tawh Volkanovski chuan chiang taka hnek fuh ve lehin awlsam takin a keuh thluk hnuin a hnek chilh mawlh mawlh. Rodriguez chuan chhan letna a nei ta meuh lova, Volkanovski kuttum a dawn hnem tak hnuin referee Herb Dean chuan insual a titawp vat ta thung.
Fight statistics atang pawhin significant strikes, ground control time, takedown ah champion lai Volkanovski a chungnung vek. An insual chhung hian vawi 7 lai Volkanovski hian Rodriguez a titlu nghe nghe. Harsa lo taka title a humhim hnuin champion lai Volkanovski chuan, "Lightweight lama khelh leh te pawh ka chak khawp mai. Lightweight kawnghren la chuh ngei hi ka duh. Mahse mi tawng tam ve tak Topuria te pawh an la awm a, kan la inhmachhawn thei bawk ," a ti.
Flyweight Champion thar Pantoja
Co-main event-ah Alexandre Pantoja chuan split decision-in Brandon Moreno hnehin flyweight champion thar a ni bawk. Hemi hma hian vawi hnih intum tawhin Pantoja a chak ve ve a, vawi thum an insual lehna ah pawh Alexandre Pantoja chuan fighter tha zawk anih zia a lantir nawn.
An insual chhung zawngin an inhnehtawk hle a tih theih. Pantoja chuan bul tan tha zawkin a hnek thlu tawp. Mipui thawm ring tak karah phur zual sauhin a hnek miah miah a, Moreno thisen kai hnuang chungin a insiamrem leh thung. Second round an khelh chhoh hnuin Pantoja chuan Moreno kuttum a dawng leh nual thung a, round thumna atang a tawp thleng chu an inlehthal tawn zak zak a, Pantoja chuan takedown leh ground control lamah a chungnung deuh thung. Minute 25 an insual hnuin split decision-in Alexadre Pantoja chuan Brandon Moreno lakah hnehna a chang zui ta nghe nghe.
Dricus du Plessis a ropui zual zel
Middleweight bout nghahhlelhawm takah Dricus Du Plessis chuan second round technical knockout-in Robert Whittaker a hneh bawk. Kum 2020 kum khan UFC debut neiin Octagon chhungah hneh thei an la awmlo.
An insual hma atangin Whittaker chak turin fighter leh expert lam pawhin ring vek. Whittaker chuan round tan phat atang a chet ranna leh a footwork hmangin Dricus Du Plessis a chhaih buai viau dawnin a lang hman. Minute 4 dawn vel chu che tha zawk mah se round 1 tawp dawnah Du Plessis chuan a tharum ngahna hmang tangkaiin a man fuh hnuin a keuh thlu. A kiu hmanga chhu zui hrepin thisen kai hnuangin Whittaker a ching hrep a ni ber
Second round-ah zet zawng South African chhul chhuak Dricus Du Plessis-a kutthlak nat zia lang chhovin chiang taka Whittaker a hnek fuh hnuin a talbuai chho. Remchang hmaih duh lovin a hnek zui miah miah hnuin second round technical knockout-in hnehna a chang bawk. Hnehna a chan hnu hian champion lai Adesanya pawh Octagon chhungah rawn lutin an inmelh rum hle a, middleweight kawnghren inchuhin an la insual thuai ngeiin a rinawm.
Dan Hooker a chak hram
Catchweight bout hmuhnawm takah Dan Hooker leh Jalin Turner insual a hmuhnawm miah miah hle bawk. Turner chuan bul tan tha zawkin a taksa seina a hmang tangkai thiam viau. Second round laihawl vel thleng pawh Turner a chungnung chho zel. Round hnihna tawp dawn hnaihah Hooker chuan a hnek fuh ta mawlh mawlh a, rear naked choke hmanga man fuhin hun a tawp hman hlauh a, mipui pawh an awm hle hle theilo a ni ber.
Third round an khelh leh hnuin Hooker chuan tuk tlawm tumin a nawr zawkah tang lehin boruak a sang zui hle. Minute 15 chhunga an insual zawh hnuin split decision-in Dan Hooker chakah puan a ni ta bawk.
Bo Nickal hneh thei an la awmlo
Main card opener-ah Bo Nickal chuan second 38 chhung lekin Valentine Woodburn lakah technical knockout-in a chak bawk. Heti hian Bo Nickal hian MMA Record 5-0 a nei tling ta chiah.
Main card
Featherweight
Alexander Volkanovski (c) def. Yair Rodríguez (ic), TKO (punches)Round 3, 4:19
Flyweight
Alexandre Pantoja def. Brandon Moreno (c) Decision (split) (46–49, 48–47, 48–47) Round 5, 5:00
Middleweight
Dricus du Plessis def. Robert Whittaker TKO (punches)
Round 2, 2:23
Catchweight (158 lb)
Dan Hooker def. Jalin Turner Decision (split) (28–29, 29–28, 29–28) Round 3, 5:00
Middleweight
Bo Nickal def. Valentine Woodburn TKO (punches)