Tun lai chu Alexander Isak a chetha rem rem, a zawnin Premier League game 8-ah goal a khung ta.
Nilaini zan khan Newcastle United chuan 3-0 in Wolves an hneh a, Alexander Isak chuan goal hnih khungin, Gordon-a goal khung tur a siam sak bawk.
Alexander Isak hi Newcastle United player zinga, a zawna Premier League game 8-a goal khung thei hmasa ber a ni a, hnehna an chan avang hian league table top 4-ah an inhlangkai.
St. James' Park-ah hian first half-ah goal khat a lut a, second half-ah goal hnih a lut. Minute 34-ah Isak chuan solo goal mawi tak a khung a, halfway line vel atanga ball a khalh chu box pawn atangin a pet a, hei hi an lo dan kawi sak hnuin a goal.
Second half minute 57-ah Bruno Guimaraes-a ball pek tha lutuk chu box chhungah dawngin, Isak chuan awlsam takin a chhuih goal leh. Minute 74-ah box dinglam sir atanga Isak ball cross chu Anthony Gordon chuan a chhuih goal ve leh a, 3-0 in Newcastle chuan hnehna an chang ta a ni.
Newcastle United hi title race-ah an tel ve em tih chungchang an sawi honaah, Newcastle leh England striker hlui Alan Shearer chuan, "Tunah rih hi chuan an tel lo. Liverpool hmahruaina hi a la tam mah mah deuh a ni.
"Chutih laiin tunlai chu Newcastle hi an chetha hle, an defending a tha si, clean sheets an nei thei zel bawk a, kawng dik an zawh chho mek a ni.
"Chutih laiin Alexander Isak hi hmatawnga a awm zel chuan, champion theih lohna chhan tur an nei bik lo," tiin a sawi.
Palina Newcastle United leh hmahruaitu Liverpool te hi point 9-in an inthlau mek a, Reds hi game khatin an la khel tlem zawk bawk.
Hetih lai hian Newcastle United an chetha hle, competition hrang hranga an game hnuhnung 9-ah hnehna an chang vek a, cleansheets vawi 6 lai an nei bawk. Goal thum emaw a aia tam emaw khungna match 6 an nei bawk a, goal khung hi an thupui a ni mek.
Tun season Premier League-ah Alaxander Isak hian goal 15 a khung tling tawh a, golden boot race-ah pathumna a ni mek. Premier League goal khung hnem ber ni mek chu Mohamed Salah niin, goal 18 a khung tawh a, Erling Haaland chuan dawtin, goal 16 a khung tawh bawk.