Liverpool fan ten Trent Alexander-Arnold an boo chungchangah Reds boss hlui Jurgen Klopp a tawngchhuak ve ta.

England international hian kum 20 Anfield-a hun a hman hnuin, Liverpool-ah contract thar ziah a tum tawh lo a, nipui bazar inhawn hunah a chhuah tur thu a puang. 

Real Madrid pantur TAA hi May ni 11-a Arsenal nen 2-2 a an inhnehtawk tumin Liverpool supporter thenkhat chuan a ball tawh apiangin an boo khum.

Kum 8 chhung Liverpool a enkawl hnua nikum nipui laia Anfield chhuahsan Jurgen Klopp chuan, "Naupang kum 18 mi lek chuan Hoffenheim lakah free kick a pet goal. Kha goal kha lut lo selang chuan Champions League kan khel thei hauh lo ang.

"Barcelona lakah ropui takin a khel a, goal 4-ah a inrawlh vek bawk. Khatiang result kha kan tawng leh tawh lo.

"In thinrim tur a ni lo tiin ka sawi thei lo, hrehawm ti suh u tih pawh ka sawi thei lo. Ka sawi theih chu ani hi in theihnghilh tawh ngai lo ang, Liverpool hian TAA hi a theihnghilh tawh ngai lo ang.

"Kha match kha ka en a, a rawn lut chiah tih khan an boo thawm ka hria. Ka TV en lai ka off nghal hmak.

"Zep lohah chuan, kha thil khan min tihnual hle a ni. Hei hi Liverpool supporter te chet dan tur a ni lo, 100 per cent-in thil dik lo a ni e.

"Liverpool tan a theihna zawng zawng a hlan a, a vunah Liverpool logo a chhu kai bawk. Tunah chuan club dang a zawm dawn ta a, keini pawhin a tawrh dan kan thiam a ngai a ni mai," tiin a sawi.