Liverpool right-back Trent Alexander-Arnold chu a inhliam a, a khup hliam avangin thla khat dawn a chawlh a ngai dawn niin Liverpool assistant manager Pep Ljinders chuan a sawi.

Sunday zan khan Liverpool hian FA Cup third round inkhelah Arsenal chu si hnih faiin an hneh a, he inkhelah hian Alexander-Arnold hi a inhliam a, Lijnders hian kar thum vel a chawlh a ngaih a rinawm thu a sawi a ni.

Liverpool hi Premier League-ah pakhatna an ni mek a, point 3 in hma an hruai a, zanin zanlai hian Carabao Cup semi final first leg inkhelah London club Fulham an mikhual dawn.

Liverpool manager Jurgen Klopp chuan Alexander-Arnold hi tun season tan hma khan an vice-captain atan a ruat a, tun season-ah kum 25 mi Reds player pawimawh tak ni lehin, Liverpool tana game 25 a khelh tawhah goal 2 a thun tawh.

Liverpool player pawimawh ber tia chhal ngam Mohamed Salah chu Africa Cup of Nations khelin Egypt tan a fehchhuak mek a, an midfielder Wataru Endo pawh Asia Cup khelin Japan tan a fehchhuak mek bawk.

Liverpool left-back pahnih Andy Robertson leh Kostas Tsimikas te chu an inhliam avangin chhawr theih an ni lova, an midfielder Dominik Szoboszlai pawh hamstring injury avangin a inkhel thei lo mek bawk a ni.