Cristiano Ronaldo chuan Al Nassr-a cham chhunzawm zel a remti a, kum 2 daih contract an zawrh chu a pawm ta a, season khat chhungin €400M lai a hlawh dawn niin media te chuan an tarlang.

Social media lama a video tawi post-ah Ronaldo chuan, "Al Nassr Forever," tih a sawi a, a contract hman lai hi tun thla tawp hian a zo dawn a, kum 2027 thleng atan contract thar a ziak ta a ni.

Portugal captain kum 40 mi hi tun thla tir lam khan a chhuak dawn niin thu a thang hman. Club World Cup khelhna hun tha tak nei mah se, a hnawl a, Saudi club-ah a insawrbing ta a ni.

Manchester United-in a contract a tihtawp hnuin kum 2022 December thla khan Cristiano hian Al Nassr a zawm a, season liamta khan goal 25 khungin SPL Golden Boot a dawng.

Portugal striker hian Arab Club Champions Cup a chawi a, Saudi Pro League leh Asian Champions League no mawi erawh a la chawi lo. Al Nassr tan game 105 atangin goal 93 a khung tawh a ni.

Ronaldo hian Sporting CP atangin bul a tan a, Manchester United a pan. United tan season 6 a khel a, goal 118 a khung hman a, Premier League no mawi 3 leh Champions League no mawi 1 a chawi.

Kum 2008 khan a vawi khat nan Ballon d'Or a dawng a, kum 2009-ah Real Madrid panin, Los Blancos tana goal khung hnem ber record a siam. Real Madrid-a a awm chhung kha a ropui em em, game 438 atangin goal 450 lai a khung a, trophy 15 lai lain, heng zingah hian Champions League 4 a tel a ni.

Juventus a pan leh a, Italian club tan goal 101 a khung a, Serie A title 2 a la a, kum 2021 khan Manchester United-ah a kir leh a, thla 16 hnuah Al Nassr a zawm ta a ni. Ronaldo hian ram tan game 221 atangin goal 138 lai a khung a, ani aia goal khung hnem an awm lo a ni.