Real Madrid chuan an captain Karim Benzema chu a chhuah tur thu an puang a, Benzema hian Saudi Arabian club Al Ittihad a zawm a rinawm.

Kum 35 mi hian Real Madrid-ah hian season khat dang daih contract la nei mah se, a contract hi Real in an tihtawp sak dawn a, free transfer in a chhuak dawn.

Saudi Arabian television Al Ekhbhariya in a tarlan danin, Benzema hian Al Ittihad-ah kum hnih daih contract a ziak dawn a, a hlawh a tam hle dawn niin a lang.

Benzema hian season khat chhungin euro maktaduai 400 zet a hlawh dawn niin chanchinbu mite chuan an tarlanga, Real Madrid-a a team mate hlui Cristiano Ronaldo nen Saudi Pro League-ah an inkhel dawn a ni.

Zanin hian Real hian tun season-a an game hnuhnung ber an khel dawna, Santiago Bernabeu-ah Athletic Bilbao mikhual dawnin, hetah hian Benzema thlahna hun an hman a rinawma, Benzema hian an supporter te mangthana hun a nei ang.

Ballon d’Or winner hian kum 2009 khan Lyon chhuahsanin Madrid khawpui hi a pan a, Los Blancos tan hian trophy 25 chawiin, Real Madrid player awm tawh zinga trophy chawi hnem ber a ni.

Real Madrid tan French striker hian game 647 a khel tawha, goal 353 zet khungin, Real tana Benzema aia goal thun hnem hi Cristiano Ronaldo bak a awm lo.

Benzema bakah hian Eden Hazard leh Marco Asensio te pawh an chhuah tur thu Real hian an puang tawha, Mariano Diaz pawh chhuak dawnin, Real Madrid hi an in siksawi nasa viau dawn niin a lang a ni.