Saudi Pro League club te chuan European club atangin player an lalut chhunzawm zel a, Paris Saint-Germain midfielder Marco Verratti pawh Saudi Arabia lamah a inpu lut dawn niin a lang.

Al Hilal chuan Verratti hi an dawr a, an inhnaih tawh hle niin chanchinbu mite chuan an tarlang a, Al Hilal hian kum 30 mi hi kum thum daih contract an ziahpui dawn nia sawi a ni.

Nikum nipui mai khan Italian midfielder hian PSG-ah kum li daih contract a ziak a, tun nipui bazar inhawn tirh khan Manchester City leh Atletico Madrid te nen sawizawm ni mah se, Middle East lama a luh a rinawm ta hle.

Saudi Pro League club zingah Al Hilal hi a che na ber pawl an ni a, tun nipui bazar chhungin Sergej Milinkovic-Savic, Ruben Neves leh Kalidou Koulibaly te an lalut tawh a, Verratti bakah hian PSG player dang Kylian Mbappe chu euro maktaduai 300 laiin an dawr mek bawk.

July thla tira Lionel Messi-a’n PSG a chhuahsan tirh pawh khan Al Hilal hian Argentina captain hi an dawr a, hlawh tam tam pek inhuam mah se Messi hian Al Hilal sawmna hnawlin Major League Soccer club Inter Miami a pan ta zawk a nih kha.

Tun nipui bazar chhungin PSG hian midfielder pahnih an lalut tawh a, Manuel Ugarte leh Kang-in Lee te niin, an hnena kum 11 lo awm tawh Verratti chu an hralh chhuak ve thung dawn niin a lang a ni.