Saudi Pro League club Al Hilal chuan Simone Inzaghi chu an head coach thar a nih thu an puang.

Champions League final-a an chak loh hnuin Italian coach hian Inter a chhuahsan a, Al Hilal-ah hian kum 2 daih contract a ziak a, Club World Cup-ah Saudi Club hi a enkawl nghal dawn a ni.

Saudi Pro League-a club hlawhtling ber Al Hilal hian league title 19 lai an la tawh a, tun season liamta khan title an hlawhchhuak zo lo a, champion Al Ittihad chu point 8 laiin an thlau.

Riyadh club hian May thla khan an coach Jorge Jesus an ban a, Asian Champions League atanga an tlak hnu lawkah an inthen ta a nih kha.

Season liamta zet kha chu Al Hilal chhungkuaah boruak inlumlet a tam hle. Kum 2023-a £80million ($102m) laia an lei Neymar chuan, match 7 chiah a khelh hnuah February thla khan chhuah zai a rel a, an coach pawh season tawp hmain an ban.

Kum 49 mi Inzaghi hian kum 3 chhung Inter Milan a enkawl a, Serie A title, Coppa Italia vawi 2 leh Supercoppa Italiana vawi 3 a lakpui a, Champions League final vawi 2 a luhpui bawk a ni.

Kum 5 chhung Lazio a enkawl hnuah  Inzaghi hian kum 2021 khan Inter a zawm a, Inter chu trophy 6 lai a chawipui a, Champions League final vawi 2 a luhpui bawk. Kum 2023 Champions League final-ah khan 1-0 in Manchester City an hneh lo a, kumin UCL final-ah 5-0 laiin PSG an hneh lo bawk.

Tun season liamta kha chu trophy lian chawi theihna hun remchang an bawhpelh. Serie A-ah hma an hruai a, season tawp lamah Napoli an inlehpelhtir, Scudetto an chawi ta lo. Supercoppa Italiana final-ah Milan an hneh lo a, Coppa Italia semi-final ah an tla bawk.