Al Hilal chuan Darwin Nunez lak tumin hma an la chho tan ta niin The Athletic chuan a tarlang. 

Nunez hi Al Hilal lak tum em em a ni a, Saudi club dang Al Nassr pawhin January transfer window inhawn lai khan an lo ngaihven tawh a ni.

Al Hilal hian Victor Osimhen, Alexander Isak leh Benjamin Sesko te pawh an ngaihven a, hetih lai hian Osimhen chuan Saudi club sawmna hi a hnawl a, Galatasaray chu a nghetin a zawm.

Isak leh Sesko pawhin Saudi lam pan an tum hmel loh a, Isak chu Liverpool chuan lak tumin hma an la mek a, an lak theih ngei pawh a rinawm. Tin, Sesko pawh Newcastle United leh Manchester United ten lak tumin hma an la mek a, ani pawh hian Saudi lam pan a tum lo a ni.

Liverpool hian Wirtz leh Ekitike te an nei tawh a, Isak lak an la tum chhunzawm reng bawk a, heng te a nih avang hian Darwin Nunez-a tan hmun a awm dawn lo niin a lang.

Kum 26 mi Nunez hi Simone Inzaghi chuan a duh hle nia report a ni nghe nghe. Nunez hian kum 2022 khan Benfica atangin Liverpool a zawm a, a man kha €100million (£85m) vel nia report a ni.

Liverpool tan season liamta khan competition hrang hrangah game 47 a khel a, goal 7 a khung. Premier League-ah erawh vawi 8 chiah inhelh bul a tan a ni.