Al Hilal chuan Liverpool atangin Darwin Nunez an la lut dawn ta a, club pahnih te hi €53million in an inrem a, Uruguayan striker hi medical nei turin a inbuatsaih mek.

Liverpool chuan Nunez hi Germany pan an phalsak a, Germany-ah hian Al Hilal chuan training camp an nei mek a, hetah hian medical an nei dawn niin The Athletic chuan a tarlang.

Kum 2022 khan Liverpool chuan Benfica atangin Nunez hi €75m-in an la lut a, Anfield-ah kum 3 chhung hun a hmang a, tunah chuan a inpu chhuak dawn ta a ni.

January thla khan Al Nassr pawhin Nunez hi lak an lo tum tawh a, mahse Nunez hian Premier League no mawi chawi a duh avangin Liverpool-a cham chhunzawm a thlang a nih kha.

Italian Club AC Milan pawhin Uruguay international hi lak an duh, mahse sum chungchangah Liverpool chhiar zat an tlin loh avangin an inhnukdawk leh a ni.

Liverpool hian Wirtz leh Ekitike te an nei tawh a, Isak lak an la tum chhunzawm reng bawk a, heng te a nih avang hian Darwin Nunez-a tan hmun a awm dawn lo niin a lang.

Kum 26 mi Nunez hi Simone Inzaghi chuan a duh hle nia report a ni nghe nghe. Nunez hian kum 2022 khan Benfica atangin Liverpool a zawm a, a man kha €100million (£85m) vel nia report a ni.

Liverpool tan season liamta khan competition hrang hrangah game 47 a khel a, goal 7 a khung. Premier League-ah erawh vawi 8 chiah inhelh bul a tan a ni.