Manchester City chairman Khaldoon Al Mubarak chuan an striker ropui Sergio Aguero chan mahse, a hmun ruak chu an hnawhkhah tur thu a sawi.

Aguero hian City-in contract thar an zawrh tawh loh avangin free transfer-in Barcelona a zawma, tun thla ral rualin City-a a contract a hmang zo dawna, July thla ni 1 atangin Barcelona player a ni tak tak dawn.

Aguero hi City-in striker an neih tawh zawng zawnga ropui ber a ni chianga, City tan game 390 khelin, goal 260 mai a khung theia, City tana goal khung hnem ber a ni.

Aguero hian City-ah Premier League title panga a chawia, FA Cup pakhat leh League Cup paruk chawi bawkin, Premier League chanchina goal khung hnem ber palina niin a chhuak dawn.

Aguero hmun ruak luah khat tu tur hi hmuh a awlsam dawn lo hle a, mahse City hian nipui bazar inhawn hunah striker tha tawk tak an lak ngei a rinawm hle a, Harry Kane leh Erling Haaland-te chu sawi rik an ni mek.

Al Mubarak chuan City TV a hrilh danin, “Sergio Aguero a chhuah hian kan legend pawimawh tak kan chan a, a hmun ruak hi hnawhkhah awl dawn lo viau mahse a hmun ruak hnawh khat tu tur tak player kan lakluh theih ngei ka ring a ni.

“Hmun dang han in thawmthat ngaihna lai pawh nei mah ila, chung chu a tam lova, quality a pawimawh ber. Kan squad hi a tha hle in ka hria a, Premier League-a champion a, Champions League final thleng bawk tur chuan squad tha neih a ngai reng a ni. Position tlema zawngah hian player tha kan lalut dawn a ni,” a ti.