Liverpool midfielder hlui Adam Lallana chuan kum 37 mi niin football khelh a chawlhsan thu a puang.

Southampton-in contract thar an zawrh tawh lo a, tun thla ni 30 hian Saints-a a contrat a tawp tawh dawn a, Lallana chuan football khelh a chawlhsan thu a puang ta a ni.

Kum 20 vel professional football a khelh chhungin Lallana hian match 569 a khel a, Southampton atanga rawn lar chhuak niin, Liverpool a pan a, Brighton lama hun a hman hnuah a chawr chhuahna Southampton-ah nikum nipui lai khan a kir leh a, hetah hian kum 1 daih contract a ziak a ni.

England tan game 34 a khel ve hman a, goal 3 a khung a, 2014 World Cup-ah leh 2016 Euro-ah England tan a inlan bawk a ni.

Lallana hi Southampton Academy chhuak a ni a, Gareth Bale, Theo Walcott, Nathan Dyer, Leon Beast leh David McGoldrick te nena chawr chhuak rual kha an ni a, kum 18 mi a nihin Saints senior team-ah a inlan tan.

Kum 2007 khan Bournemouth lamah loan-in a kal a, Saints chuan an ko kir leh vat a, Southampton player pawimawh tak a ni chhunzawm ta a ni.

Kum 7 hnuah Southampton chu Premier League-ah a hlangkai a, kum 2012 khan Saints captain atan hman a ni tan bawk.

Kum 2014 khan Liverpool chuan £25million-in an lei a, Reds tan game 178 a khel a, kum 6 Anfield-a hun a hman chhungin trophy 4 a chawi. Heng zingah hian Premier League leh Champions League te pawh a tel nghe nghe.