AC Milan chuan an striker hlui inkhelh chawlhsan tawh Zlatan Ibrahimovic chu an club a koh kir leh an tum mek niin Italian chanchinbu Calciomercato chuan a tarlang.

Hliamin a kiansan hleithei lo bawk nen, Zlatan hian season hmasa a zawh hnu khan inkhelh a chawlhsan thu a puang a, Milan hian an club hrechiangtu hi an club a nihna pek an tum nia tarlan a ni.

Kar hmasa a Milan in Champions League group stage inkhela Newcastle United an mikhual tum khan, Zlatan hi San Siro a hmuh a ni a, hetah hian Milan nen inbiakna an nei tan tawh niin a lang.

Milan hian June thla tir khan an technical director Paolo Maldini an ban a, Zlatan hi Maldini-a hmunruak kalsan hnawhkhat turin Milan hotute chuan an duh niin chanchin thenkhat chuan an ziak a, Zlatan hi San Siro ah a kir leh lovang tih a sawi theih loh.

Milan neitupa Gerry Cardinale chuan kum 41 mi hi an club a seng luh leh a tum hle nia sawi a ni a, eng hna nge pek a tum tih chiang taka sawi theih a la awm lova, mahse Cardinale hian Swedish footballer hlui hi technical director hna a zawrh nia sawi a tam hle a ni.