Serie A champion Inter Milan chuan free transfer-in Turkish midfielder Hakan Çalhanoğlu an lakluh thu an puanga, kum 2024 June thla thleng contract an ziahpui.

Kum 27 mi Çalhanoğlu hian AC Milan-a a contract chu tun thla ral rual hian a hmang zo dawna, AC Milan chhuahsan mahse San Siro a chhuahsan lova, AC Milan hmelma lian ber Inter Milan lamah a insawn ta a ni.

Euro 2020-a Inter midfielder Christian Eriksen a tluk hnu khan Inter hian midfielder thar an melh nghala, an thenawm club atangin Çalhanoğlu hi an lalut theia, kum thum daih contract an lo ziahpui.

AC Milan hian kumin kum tir khan Çalhanoğlu hi contract ziahpui an tuma, season khatah euro maktaduai 4 hlawh turin thlem mahse an hlawhchhama, Inter-ah hian Çalhanoğlu hian season khatah euro maktaduai 5 a hlawh dawn nia sawi a ni.

Çalhanoğlu hian season liamta khan Serie A-ah chance 98 lai mai a siam chhuaka, Europe league lian pangaah ani aia chance siam chhuak hnem tu mah an awm lo.

AC Milan atanga Inter Milan-a player insawn hi thil thleng zen zen a ni lova, kum 2012 khan Antonio Cassano chu AC Milan atangin Inter-ah a insawna, hemi hnuah tun hi AC Milan atanga Inter-a player insawn an awm leh vawi khatna a ni.

AC Milan hian heti hian an player duh lai pahnih chu contract thar an ziahpui theih loh avangin tun nipui chhungin an chan ta a, Çalhanoğlu hma hian goalkeeper kum 22 mi Gianluigi Donnarumma chuan AC Milan a lo chhuahsan fel tawh bawka, ani hi PSG-a lut tura ngaih a ni.