Arsenal boss Arsene Wenger leh United boss Jose Mourinho te chu tunhmain nasa takin an inel tawh thin a, inkawmngaih tak an ni lo chiang a ni. Hetihlai mek hian Arsene Wenger chuan United boss hun tawn mek a hriatthiam thu leh a tawrhpui thu a sawi. United hi kan hriat angin tunkarah Champions League atanga pet tlak an ni.
(adsbygoogle = window.adsbygoogle || []).push({});
Mourinho hian sawiselna nasa tak a tawk mek a, UEFA Champions League-a Sevilla 1-2 a an hnehloh hnu pheichuan a tactic hman dan chungchangah leh Manchester United a kalpui danah tawngkam na tak taka beihna a tawk tam hle.
Wenger pawh hian hetiang deuh hi chu a tawk nasa chho em em a, United boss hun tawn mek chu a hriatthiam pui hle tih a tarlang.
Arsenal boss hi tunkar mai khan a elpui thin United boss hlui Sir Alex Ferguson chuan a lo chhan ve tawh bawk a, hemi vang deuh te pawh hi ani mahna, tuna United boss Mourinho a tawrhpui thu a rawn tarlan tak. Amaherawhchu tun hma deuh khan Mourinho hian Wenger chu na taka tawngkhumin 'Specialist in failure' tiin chakloh a thiam hle thu a lo sawi tawh anih kha kan la hria ang chu maw!
Wenger chuan , "A tuartu apiang ka tawrhpui hle a ni. In (media) hna chu mite tawrh tir ani a, kan hna erawh chu mi tawrh tir loh ani thung.
"English Football hian hmasawn zel se ka duh a, mahni a beiseina insiam nasa ber kan niin ka hria a, chuvangin kan tawrhna lian ber pawh kan beiseina insiam kan phak lohna hi a ni.
"Mipakhat thilsawi in hre duh em? Kan pian hian miin min hmangaih a, chutiang bawkin kan thih hian min hmangaih bawk. A inkarah erawh chuan i in manage a tul a ni.
"Mi zawng zawng hi hlim vek se ka duh. Manchester United chungchang pawh hi sawi tam ka duh lem lo a, a chhanchu ka hna chu Arsenal enkawl a ni.
"A pumpuiah chuan English Football hian thatlam pan zel se ka duh takzet a, manager zawng zawng hi hlim vek ila ka duh a ni. Amaherawhchu chu chu thil theihloh ani si"
Arsenal hian zaninah AC Milan chu Emirated Stadium-ah an hmachhawn dawna, first leg-ah 0-2 in hma an hruai tawh a, an dinhmun a chhe lem lo hle.
Tun UCL knockout stage-ah khan Premier League team ten an Home match khelhah tuman hnehna an chang zo lo a, amaherawhchu Liverpool leh Manchester City ten away-ah result tha tak an nei thung. Heihi Arsenal chuan an chhunzawm ve mek.
"Europe-a khelh hi chu rilru thlengin fimkhur angai hle a, Away game kan chak chuan Home-ah kan kenkawh hram a tul a, chu chu thil awlsam ani lo a ni" tiin zanina an khelh tur chungchang a sawi tel.