Sunday zan khan Dutch top flight league inkhelah Dutch team lian pahnih Ajax leh Feyenoord te an inkhela, mahse he inkhel hi 56mins-a tihtawp a ni.

Ajax leh Feyenoord inkhel hi De Klassieker tia sawi thin a ni a, Ajax hian Eredivisie champion lai Feyenoord chu Johan Cruyff Arena-ah lo mikhualin, home fans lamin khelmual chhunga halpuah leh flare an vawm luh nasat avangin an inkhel chhunzawm thei lo.

First half-ah mikhual lam Feyenoord chuan si thum faiin hma an hruai a, first half-ah hian halpuah leh flare te hi khelmual chhungah fans in an vawm lut tan tawh. Darkar khat an khelh tlin hma deuhin inkhel tihtawp lailawk a ngai ta hial a, buaina a zual zel avangin inkhel an suspend ta a ni.

He chanchin ziah lai hian he inkhel hi engtia chhunzawm tur nge tih puan a la awm leh lova, Eredivisie chuan inkhel chhunzawm dan tur nakina an la puan tur thu an tarlang.

Feyenoord tan hian Santiago Gimenez chuan goal hnih a thun mah se, Igor Paixao chuan goal khat dang a thun bawk a, Ajax hian an big screen ah halpuah hal khap a nih thu tarlang mah se fans lamin an ngai pawimawh lo hle.

Ajax hian season bul an tan tha lova, khelh 4 atangin vawi khat bak hnehna an la chang lova, 13-naah an awm mek. Season hmasa khan Feyenoord hi Eredivisie-ah an champion a, Ajax hi pathumna niin, season 13 hnua Champions League an khelh phak loh vawi khatna a ni.