Italy chu hneh loh nei loin an kal tluang hle a, tun dinhmunah hneh loh nei lo hian game 32 chu an kal mek a. Nizan lama quarter final an khelhah Belgium chu 2-1 in an hneh a, semi final an lut tawh a ni.
Roberto Mancini pawlte hi Euro 2020 khelh tan a nih hma atang tawh khan team che tha ber pawl an ni tawh a, European Championship an tan a, an che tha tluang zel bawk a. Tournament kal mekah Italy team hian goal 11 lai an thun tawh a, an lamah hian goal 2 chiah a la lut a ni.
Match 32 chhung hneh loh nei loa kal tluang an ni tawh bawk a, Euro 2020 champion thei tura rin kai ber pawh an ni mek a. Italy hian hneh loh an neih hnuhnun ber chu 2018 ah daih tawh khan niin, UEFA Nations League group stage an khelhin Cristiano Ronaldo te team Portugal an hneh lo a, kha mi hnuah kha chuan tun thlengin hneh loh an la nei leh ta miah lo a ni.
Vawi 4 ngawt world champion lo ni tawh Italy hian a hmaa hneh loh nei loa kal tluang rei record an lo siam tawh chu tunah hian an khum a. 1930 chho velah khan hneh loh nei loin game 30 chhung chu an lo kal tluang tawh a, a hmaa record an siam hi match 2 in an pel tawh a, a aia tama pelh an la tum hle.
1935 atanga 1939 chhung khan Azzurri chu coach Vittorio Pozzo kaihhruaina hnuaiah an che tha thei hle a, tar lan tawh angin match 30 chhung chu eng team mahin an hneh thei lo a. He mi hun chhung hian European khawmualpuia team tha ber pawl hian a vawi hnihna atan World Cup trophy an la a, 1938 ah an champion a. Hei bakah hian 1936 kumah khan Olympic lamah pawh an che tha hle a, gold medal an la bawk a ni.
Mancini leh a pawlte hian anmahni ram record lo siam tawh chu an khum der mai a, khawvel puma record ding lai pawh an hnaih tawh viau mai a, an chet that chhoh zel chuan record thar an siam lo ang tih sawi theih a ni ta lo.
Brazil leh Spain te chu record ding lai chelhtu an ni a, heng ram pahnih te hi hneh loh nei loa an kal tluan zat a inang a. 1993 leh 1996 inkarah khan Brazil chu hneh loh nei loin match 35 chhung an lo kal tluang tawh a. Spain pawh hi 2007 leh 2009 inkarah khan hneh loh nei loin match 35 tho an lo kal tluang tawh bawk a ni.
Record ding lai chu match 35 chhung niin, tunah Italy chu match 32 chhung hneh loh nei lo hian an kal tluang mek a, record khum tur chuan match 4 khelhah an tlawm loh a ngai dawn a ni.
Tun dinhmunah Italy bakah hian Algeria chauh hneh loh nei loa kal tluang mek an awm a. African Nations Cup champion lai hi match 27 chhung chu hneh loh nei loin an kal tluang ve mek a ni.
Hneh loh nei loa kal tluang hnem zual
Brazil : 35 (1993-1996)
Spain : 35 (2007-2009)
Italy : 32 (2018-present)
Argentina : 31 (1991-1993)
Italy : 30 (1935-1939)
France : 30 (1994-1996)
Algeria : 27 (2018-present)
West Germany : 23 (1978-1981)
France : 23 (2010-2012)