30%-in Lukaku-a’n a hlawh a tihniam

23rd June 2022, 11:06AM

Chelsea striker Romelu Lukaku chu a club hlui Inter Milan-ah a kir dawn a, Inter Milan-a a kir theih nan Lukaku hian 30% laiin Chelsea-a a hlawh chu a tihniam nia tarlan a ni.

Chelsea player man to ber Lukaku hi loan-in Inter-ah hian a kir tawh a, Chelsea leh Inter te chuan Lukaku chungchangah hian inremna an nei tawh niin Sky Italia chuan a tarlang.

Chelsea-ah season khat chhungin, Lukaku hian chhiah a pek hnuah pound maktaduai 10 a hlawh mek a, Inter a zawm hnuah erawh kum khatah chhiah a pek hnuin pound maktaduai 7 a hlawh dawn a, a hlawh zawng zawng hi Inter in an tum dawn nia tarlan a ni.

Inter hian Lukaku hi season khat chhung atan loan-in an lalut dawn a, lei zui theihna an nei dawn lova, Lukaku lakluh nan hian loan fee euro maktaduai 8 bakah add-ons an seng dawn nia tarlan a ni bawk.

Nikum mai khan Chelsea hian pound maktaduai 97.5 zet sengin Lukaku hi Inter atang hian an lei a, season liamta khan Chelsea tan Premier League game 26 atangin goal riat a khung a ni.


Inkhel Youtube News, Pic-ah hian click rawh le

Copyright © inkhel.com 2022. All rights reserved.