British Olympic Association hruaitute chuan 2024 Paris Olympic Games neih hunah breakdancing chu telh an duh thu an sawi.
Paris Olympic Games huaihawttu turte chuan 2024 Olympics neih huna infiamna telh tur an thlifim mek a, heng zingah hian breakdancing, skateboarding, wall climbing leh surfing te chu telh turin an rawt a. Karate leh squash lampang chuan sawi tel an nih ve loh avangin tuna rawtna hi an pawm ve lo hle.
Tokyo Olympics ah chuan skateboarding, climbing leh surfing te chu an tel vek dawn a, 2020 ah hian baseball leh softball bakah karate te pawh an ti tel dawn bawk a. Mahse, 2024 atan chuan karate leh squash te chu sawi rik an ni lo a, heng infiamna pahnih bakah hian snooker leh chess te pawh an sawi tel lo a ni.
Karate leh squash bakah snooker leh chess te chu 2024 Olympic Games ah hian telh turin rawtna chu an theh lut a. Paris Olympics-ah hian infiamna 28 chu an ti tel tawh a, heng bakah infiamna dang belh tur hi an ngaihtuah chho mek a ni.
Tun hnaia Buenos Aires a Youth Olympics an neihah khan breakdancing chu an ti tel a, mahse medal dawn theihin an ti lo thung a. Youth Olympics-ah hian thalaite ngaihven zawng tak a nih avanga ti tel an ni a, an beisei aia a hlawhtlin tak em avangin Paris Olympics-ah pawh telh an duh phah a ni.
Paris organising committee hotu Tony Estranguet chuan, “He infiamna hi khawvel hmun hrang hrangah a lar em em a, hei vang tak hian Games-ah pawh hian tih tel kan duh phah a. Breakdancing kan ti tel a nih chuan a hma aiin mi pawh Games hian a hip belh thei dawn a, a fan thui lehzual turah kan ngai,” a ti.
“Infiamna chi hrang hrang hmangin an intihsiak leh dawn a, heng infiamna tam tak chu kan lo hriat than tawh, an lo tih chhoh reng tawh an ni hlawm a. Breakdance hi chuan boruak dang daih a keng dawn a, miin an ngaihven dan pawh a inang tawh dawn lo hle a ni,” a ti bawk.
International Olympic Committee (IOC) chuan Games-ah hian infiammi 10,500 aia tam tel loh ni se tiin kaihhruaina an siam a. Karate, squash, snooker leh chess te an ti tel a nih chuan infiammi 248 an tel belh dawn a, heti a nih chuan a hmaa tel tura an lo tih thenkhat chu an chhawk ve leh thung a ngai dawn a ni.
British Olympic Association (BOA) chuan Paris 2024 a breakdancing telh chu an thlawp thu sawiin, Team GB chuan he category hi an ti tel dawn a nih pawhin tel tur an neih dawn leh dawn loh an la hriat loh thu an sawi a. Aiawh tirh tur nei ve dawn lo mahse zau zawka thlirin an thlawp tho tho niin an sawi.