World Cup Quarter Final-ah England leh France an inhmachhawn dawn a, he match hi mite nghahhlelh a ni, inkhel hmuhnawm tak a ni bawk ang a, tactical battle hmuhnawm tak kan hmu ngei bawk ang. He match-a mite ngaihven tur ber chu Kylian Mbappe hi a ni kan ti thei awm e.

Lionel Messi-a'n Argentina hnuk kal mah se Mbappe erawh level dang a ni kan ti thei awm e, kumin World Cup-a mimal langsar ber chu PSG forward Mbappe hi a ni chiang mai.

Tun dinhmunah chuan PSG forward Kylian Mbappe hi khawvel player tha ber a ni ti ila kan sawi sual lo ang. Mi tam tak titi tui ber a nihna  hi Three Lions vang mai mai hian tawp ang em?

Mbappe chungchanga chungchang hi thlur bing deuh ang aw.

Football History-a player man to ber dawttu a ni.

Mbappe hian kum 2017 khan Monaco atangin PSG hi loan-in a zawm. Rei loteah euro 180m(£166m)in a nghetin PSG chuan lei. Hei hi football transfer man to ber dawttu a ni. Man to ber chu Brazil forward Neymar a ni a, ani kha Barcelona atangin PSG bawk hian euro 222m(£200m)in 2017 khan an lei a nih kha.
 
Mbappe hian French champions PSG tan game 237 a khelh tawhah goal 190 a khung  tawh.  Brazil player Neymar leh Argentina player ropui Lionel Messi-te ho nen club khatah an khel mek.

A hnuhma ropui tak tak thlir ila :

Kum 7 professional football a khelh chhunga trophy a chawi tawh te:
    2018 World Cup
    2020-21 Uefa Nations League
    Lique 1 title 5 (4 PSG-ah, 1 Monaco-ah)
    French Cup vawi 3
    French League Cup  vawi 2

Mimal lawmman a dawn tawh te:

    Golden Boy award, 2017
    French player of the year vawi 2
    Ligue 1 player of the year vawi 3
    Young player of the year vawi 3
    Ligue 1 top goalscorer season vawi 4-ah.

Heng bakah hian tun World Cup kal lai mekah player naupang zinga tha ber nia sawi a ni. Player naupang mai ni lo, inkhel zawng zawng zinga che tha ber a ni hial ang.

PSG hi an Champions League final hmasa ber lut turin kum 2020 khan a lo pui tawh bawk. Mahse Bayern Munich an hneh zo ta lo a nih kha.

World Cup ti hlutu a ni mek a, 2018 Brazil World Cup-a  France-in hnehna ropui an chan tum khan Mbappe hi kum 19 chuah a la ni. Croatia laka 4-2 a hnehna an chan tuma goal a khung khan rawlthar World Cup final-a goal khung thei pahnihna a ni a. World Cup final-a rawlthar goal khung thei hmasa ber chu Brazil legend Pele niin kum 1958 khan final-ah goal hlu tak a khung a ni.

Qatar World Cup-ah hian goal 5 khung tawhin, a la khung hnem ber a. Diego Maradona leh Cristiano Ronaldo-te World Cup goal khung tawh zawng zawng aia tam Mbappe hian World Cup vawi 2 lek atangin a khung tling der tawh. 

Kum 24-a Portugal tana goal 8 khung Eusebio-a record a khum a, kum naupangtea World Cup record thar siam zel thei a ni dawn tlat mai. Paris daifema piang leh seilian Mbappe hian local team AS Bondy-ah bul tanin, Monaco-ah December 2015 khan a professional career-a a game hmasa ber a khel tan.

Kum 16 leh ni 347 a upa niin club history-a player naupang ber a ni a, France leh Arsenal legend Thierry Henry-a’n kum 1994-a record a siam chu Mbappe hian a khum a ni. Senior goal hmasa ber a khungin Club-a goal khung thei naupang ber a ni nghal bawk.

Last 16-a France in Poland 3-1 a an hneh khan Mpabbe-a tlan chak zawng speed hi  35.3km/h  nia tarlan a ni. Tun World cup-ah hian amah aia tlan chak player 6 chiah record an la awm. 

September thla khan Ligue 1   player zinga tlan chak ber a ni a, khatah khan a speed chu 36km/h a ni a. A chak zia kan hriatthiam theih dan tur chuan khawvela tlan chak ber record siamtu Usain Bolt speed tlangpui hi 37.5km/h a ni.

Real Madrid lamin nasa takin nipui bazar liamta khan an sawm a nih kha, mahse PSG tana khelh chhunzawm zel a thlang ta zawk a. kum 3 chhung atan PSG-ah contract thar a ziak leh a nih kha.

Spanish football expert Guillem Balague  chuan he club pahnihte  hian euro  150m (£127m) signing fee atan pek an huam ve ve niin a sawi. Real Madrid hi hnawl mah se engtik emawah chuan Spanish club lian hi zawm a la tum tho nia tarlan a ni.

October thlaa footballer hlawh tam Forbes-in  a tarlan zingah a hmasa ber a ni a. Player hlawh hnem ber nihna hi Messi leh Ronaldo-a’n kum 9 chhung an lo luah tawh hnua rawn luah ve thei hmasa ber a ni. Tun season-ah  $128m (£115.2m) hlawh tur anga chhut a ni.

Mbappe hi social media lamah pawh lar hlein Facebook, Instagram leh Twitter-a a followers neih zat belh khawm hi million 100 bawr vel a ni a. Tunah pawh hian World Cup 2022-a a chet that em avangin Messi, Ronaldo leh Neymar-te zingah player thawm nei lian ber a ni mek.

A celebration dangdai tak pawh Fifa 21 game-ah tarlan a ni a, 2022-a edition thar a chhuah hma zawngin infiam mi FIFA cover-a lang thei naupang ber nia tarlan a ni.
2018 World Cup-a hnehna an chan hnu khan, tournament chhunga a hlawh zawng zawng  £380,000 chu naupang harsa puala a hlan vek thu Mbappe hian a sawi.