Sunday zan khan 2022-23 Premier League season hmawr bawk fel a ni a, team zawng zawngte an inkhel rual vek a, team tam zawk te dinhmun tur a chian tawh avangin table mawng lam te inkhelin ngaihven a hlawh zawk a tih theih awm e.
Kan hriat theuh angin Manchester City an champion fel tawh a, top 4-a awm tur te pawh a chiang tawha, Southampton an tla fel tawh bawk. Premier League atangin season tharah Manchester City, Arsenal, Manchester United leh Newcastle United te chuan Champions League an khel dawn a, Liverpool leh Brighton te chuan Europa League khel dawnin, Aston Villa chuan Europa Conference League an khel bawk ang.
Everton, Leicester City leh Leeds United te chu tla thei vek dinhmunah an dinga, an zinga pahnih hi tla tur an ni a, Everton chu a inham tang theiah tangin, Leicester leh Leeds te chuan Premier League an mangtha a ngai ta a; Burnley, Sheffield United leh Luton Town te chu Championship atangin Premier League-ah an chho ve thung.
Everton dinhmun hi a tha ber sa a, an chak a nih chuan an him dawna, Leicester leh Leeds te erawh an chak a nih pawhin Everton result-ah an innghat. Season khar niah Leeds hi an tlawm a, Leicester chu chak mah se, Everton an chak ve bawk avangin Leicester leh Leeds an relegate ta a ni.
Everton hian Goodison Park-ah Bournemouth an lo mikhual a, Abdoulaye Doucoure-a goal khat hmangin Everton hi an chak a, Doucoure-a goal hi tun season-a an goal pawimawh ber tih theih a ni.
Everton hi Premier League awm tirh atanga la relegate lo club tlemte zinga mi an ni a, Premier League atanga la tla lo hi Everton bakah hian Arsenal, Liverpool, Manchester United, Chelsea leh Totteham te chiah an awma, Everton hi a zawnin season 68 chhung English top flight league-ah an awm tawha, season thar hi an season 69-na tur a ni.
Leicester City hian King Power Stadium-ah West Ham an mikhual a, 2-1 in Leicester an chak. Leicester tan hian Harvey Barnes leh Wout Faes te chuan goal an khunga, West Ham goal khat hi Pablo Fornals-a’n a khunga, 2015-16 Premier League season champion Leicester hian 18-na niin season an khar.
Chak ngei ngei mamawh Leeds chuan Elland Road-ah Tottenham an lo mikhuala, 4-1 laia an tlawm avangin an tan Premier League-a inham tan ngaihna a awm lova, 19-na dinhmun an hauha, 20-naa awm Southampton nen point 6 in an inthlau. Tottenham hi 8-naah awmin season tharah European football an khel dawn lo.
Leeds leh Tottenham inkhelah hian Tottenham striker Harry Kane chuan goal 2 a thun a, heti hian England captain hian tun season-ah league goal 30 a thuna, tun season-a Premier League top scorer Erling Haaland chu goal 6 in a pha lo.
Champion fel tawh Manchester City chuan season khar niah Brentford an hneh lova, pahnihna dinhmun hauhtu Arsenal erawhin si nga faiin Wolves an sawp ve thung. Heti hian City hian point 89 hlawhchhuakin season an khara, Arsenal nena an inkarah point 5 a awm.
Manchester United chuan 2-1 in Fulham chu Old Trafford-ah an hnehna, point 75 hlawhchhuakin United hian pathumna dinhmun an hauha, Fulham hi 10-na niin, point 52 an hlawhchhuak a ni.
Liverpool chuan season khar niah hian tla fel tawha khel Southampton an luhkhunga, team hnihte hi 4-4 in an inhnehtawk. Liverpool hian season tharah Champions League an khel dawn lova, 5-na niin season an khara, point 67 an hlawhchhuak.
Tun season-a che chhe em em Chelsea chuan Stamford Bridge-ah Newcastle United lo mikhuala, si khat ve ve inpe in team hnihte an inhnehtawk. Chelsea hian point 44 bak an hlawhchhuak lova, 12-na niin season an khara, Newcastle erawhin season an hmang tha hle. Newcastle hian palina dinhmun an hauha, point 71 hlawhchhuakin, kum 2002-03 season hnuah a vawi khat nan Champions League football season tharah an khel dawn a ni.
