2022-23 Indian Super League chu khelh zawh a ni ta a, inrinni zan khan final khelh niin, penalty shootout-ah ATK Mohun Bagan chuan Bengaluru FC an hneh a, an champion ta a ni.
ISL chuan mimal lawmman sem kawngah league game an ngaihpawimawh zia a lang chiang, Mizo tlangval Lallianzuala Chhangte chu ISL Best Player (Hero of the League) atan an thlang.
Indian footballer zinga he lawmman dawng thei pahnihna a ni a, Sunil Chhetri khan ISL Best player lawmman a lo dawng tawh a, India player zinga he lawmman dawng leh thei hmasa ber chu Lza Chhangte hi a ni ta a ni.
Lianzuala hian league-ah Mumbai City FC ropui takin a khelhpui. Tun season chhungin goal 10 a khung bakah assists vawi 6 a nei. Mumbai City FC chu Shield Winner a nihpui a, khelh 20 atangin point 46 an hlawhchhuak a, pahnihna Hyderabad FC nen an inkar chu point 4 a ni.
Shield winner ni mah se, semi final-ah Bengaluru FC chu penalty shootout-ah an hneh lo hlauh, final an khel ve thei ta lo a ni.
Champion zo lo mah se Lianzuala chu tun season ISL-a player tha ber a ni tih a lawmman dawn hian a nemnghet.
Lza Chhangte hian pawisa fai Cheng nuai 5 a dawng tel bawk, hetih lai hian a hmunah he lawmman hi a dawng thei lo, tunah hian India team te chuan camp an nei mek a, Lza chuan video message thawnin lawmthu a sawi.
Mizo zingah ISL mimal lawmman dawng 5 an awm ta a, Jeje Lalpekhlua (2015), Jerry Lalrinzuala (2016), Lalruatthara (2017) leh Lalengmawia Ralte (2020-21) te chuan Emerging player of the league lawmman an lo dawng tawh a. Lallianzuala Chhangte chuan tun season ISL Best player lawmman a dawng ta a ni.
Tun season chu Lza a OP kher mai, Durand Cup-ah game 7 khelin goal 7 a khung a, assist vawi 3 a nei, Golden Boot winner a ni a, nuai 3 a dawng bawk.
Indian Super League lamah Game 22 atangin goal 10 a khung a, assist vawi 6 a nei. AIFF Player of the Year a nih ngei a rinawm hle.
Mahni inthunun thei mi a ni a, Pathian tih em em a ni bawk a, naupang zawkte tana HERO nih a tlin hle.
A tlan chak em em a, goal a khung theih bakah Mumbai City attacking a ti na em em bawk. Ani ang player ropui kan nei hi Mizo te kan vannei hle, kan chhuang tak zet a ni.