Parc Olympique Lyonnais, Lyon-ah Spanish club Atletico Madrid leh French club Marseille te chuan Europa League final an khel a, Griezmann-a goal hnih leh Gabi-a goal khat hmangin Atletico Madrid hian si thum faiin hnehna an chang a, an champion ta a ni.

Europa League final game khata goal hnih khung thei player hi an tlem kher mai, kum 2009/10 khan Diego Forlan chuan goal hnih a khung a, 2011/12 khan Radamel Falcao chuan goal hnih a khung ve leh a, tunah a pathumnan Griezmann chuan goal hnih a khung ve ta a ni.

Marseille 0-3 Atletico Madrid

(Griezmann 21', 49', Gabi 89')

PLAYER RATINGS

ATLETICO: Oblak 6; Vrsaljko 6, Giménez 7, Godín 7, Lucas 7; Gabi 8, Saúl 7, Koke 8, Correa 7; Griezmann 9, Diego Costa 7. Subs: Juanfran 6, Partey n/a, Torres n/a.

MARSEILLE: Mandanda 6, Sarr 7, Rami 7, Luiz Gustavo 7, Amavi 7, Anguissa 6, Sanson 6, Thauvin 5, Payet 6, Ocampos 6, Germain 5. Subs: Lopez 6, Njie 6, Mitroglou 6.

Marseille-in bul an tan tha zawk, game an thunun nghal, goal pawh an khung nghal teuh hle. Tan atanga minute lina lekah Dimitri Payet chuan chance tha lutuk a siam, a through ball tha deuh chu Valere Germain chuan a pet goal ngei dawn emaw tih laiin beisei phak baka chhiain a pet. Marseille lamin an nawr char char a, hetih lai hian an tlarhnungte an chesual tlat mai le.

Goalkeeper back pass chu central defender pahnih Rami leh Gustavo te chuan a sirah an pawt ve ve, midfielder Andre Anguissa chu a laiah a awm. Marseille goalkeeper Steven Mandanda chuan Andre Anguissa ber kher chu a pass, Atletico Madrid player ten pressure an rawn pe tawh si a, Anguissa hian ball a dang sual hlauh bawk nen, hemi per hi Gabi chuan lain Griezmann tan a pe nghal a. Griezmann chuan box chhungah a tlanluhpui hnuin awlsam takin a pet goal ta a ni.

Darkar chanve an khel tling vel chiah tihin Dimitri Payet chuan a malpui tha a tihliam palh hlauh, World Cup a hnai tawh, France-in squad an puang hnai tawh bawk nen, engtiang chiaha hliam na nge tih chu sawi theih ni lo mahse mittui nen mual chhung a chhuahsan avangin a hliam hi a ngaihtuahawm niin a lang. Payet hi kum 20 mi Maxime Lopez chuan a rawn thlak a. First half-ah goal dang a lut lo, half time a nih chuan si khat faiin Atletico Madrid chuan hma an hruai.

Second half tan a ni a, minute li an khel tling vel chiah tihin Griezmann chuan goal hnihna a khung. Koke chuan dinglama Griezmann tlan chu hmuin through ball tha tak a pe, Griezmann chuan box chhungah lalutin goalkeeper rawn up chu cool takin a chip khum ta. Si hnih faiin Atletico Madrid chuan hma an hruai. Griezmann hian tun season European competition-ah goal 8 a khung ta a, competition hrang hrangah Atletico Madrid tan goal 29 a khung tling ta bawk.

Marseille game a buai chho tulh tulh, chance insiam tum thin mahse tihsual an ngah hle. Hetih lai hian hrem avanga touchline atanga a team te enkawl ve thei lo Diego Simeone-a naute erawhin an nawr na tual tual a, chance hlauhawm pawh an nei zauh zauh bawk. Hun tawp a hnai ta, minute 10 chiah a awm tawh, Marseille chuan tlawm mai an tum lo tih a chiang. Bench atanga lut Konstantinos Mitroglou chuan Marseille tan a tauh goal teuh kher mai. Mual dinglam sir atanga Morgan Sanson cross tha zet chu Konstantinos Mitroglou chuan box chhung atangin a tauh, Atletico Madrid goal ban a per.

Hun tawp dawn tak tak 89 mins-ah Atletico Madrid chuan counter attack an nei, Costa chuan ball chak takin a um a, mual veilam sir atangin a bul hnaia awm Koke tan a pe, Koke chuan box dinglam sira awm Gabi tan a pe leh a, Gabi chuan bottom corner-ah awlsam takin a pet goal ta a. Goal dang a lut tawh lo, si thum faiin Atletico Madrid chuan hnehna an chang ta a ni. He match-ah hian goal hnih khungtu Griezmann chu man of the match-a thlan a ni a, a vawi thum nan Atletico Madrid chuan Europa League title an la ta a ni.