Pathianni tlai khan International Stadium Yokohama, Yokohama (Japan)-ah 2016 FIFA Club World Cup final khelh a ni a, Europe champions Real Madrid chuan 4-2 in Japanese club Kashima Antlers an hneh a, 2016 Club World Cup champion an ni ta a ni.
Real Madrid 4 - 2 Kashima Antlers (AET)
(Benzema 9', Ronaldo 60' pen, 97', 104') (Gaku Shibasaki 44', 52')
Real Madrid tan 2016 Ballon d'Or winner Cristiano Ronaldo chuan hattrick a siam a, Benzema chuan goal khat a khung bawk a, Kashima Antlers tan Gaku Shibasaki chuan goal hnih a khung bawk a ni.
Hun pangngai-ah 2-2 in an inhnehtawk a, extra time khelh a ni a, hetah hian Ronaldo chuan goal a hnih a khung a, 4-2 in Real Madrid an chak ta a ni.
Tan atanga minute 9-na lekah Real Madrid tan Benzema chuan goal hmahruai a khung. First half tawp dawn tepah Gaku Shibasaki chuan Antlers si phurh a rul a, second half tan rualin Gaku Shibasaki bawk chuan a goal hnihna a khung.
2-1 in Antlers chuan hma an hruai. 58 mins-ah Lucas chuan Real Madrid tan penalty a hlawhchhuak a, he penalty hi Ronaldo chuan goal-ah a chantir. Hun pangngaiah 2-2 in an inhnehtawk.
Extra time khelh a ni a, 98 mins-ah Antlers offside thang a per sual, Ronaldo chuan goal a khung phah. 104 mins-ah Ronaldo chuan hattrick a siam ta nge nge. 4-2 in Real Madrid chuan hnehna an chang ta a ni. He match-ah hian Ramos a vannei hle a, referee laka a khawsak danah red card a chawi lo hlauh a ni.
Ronaldo hian Real Madrid a zawm atang khan hattrick vawi 40 a siam ta a, ram leh club tan Ronaldo hian a game hnuhnung 16 atangin 20 a khung tling ta bawk a ni.
Ronaldo tan kar duhawm a inherchhuak a, Ballon d'Or a vawi 4-nan a dawng, ningani khan club tan goal 500-na a khung a, Pathianniah Real Madrid tan hattrick vawi 40-na a siamin Club World Cup title a la. Kumin chhungin Ronaldo hian Champions League title, Euro 2016 title leh Club World Cup title a la ta a ni.
2016 Club World Cup -ah hian Ronaldo chuan goal 4 a khung a, Golden Ball pek a ni a, Luka Modric leh Gaku Shibasaki te chuan silver leh bronze an dawng a. Real Madrid hi game 37-ah a zawnin hneh loh an la tawng lova, an la kaltluang zel a ni.